సీమలో పెళ్లికి తెలంగాణ సీఎం కేసీఆర్!

రాష్ట్ర విభజన తర్వాత తెలంగాణ సీఎం కేసీఆర్ మరోసారి ఏపీకి వెళ్తున్నారు. ఇది వరకూ తెలంగాణ ఏర్పడినందుకు మొక్కు తీర్చుకునేందుకు తిరుమల శ్రీవారిని దర్శించుకున్నారు కేసీఆర్. అలాగే ఏపీ నూతన రాజధాని అమరావతికి శంకుస్థాపనప్పుడు కూడా వెళ్లారు. ఇప్పుడు ఒక వివాహానికి కేసీఆర్ వెళ్తున్నారని తెలుస్తోంది. ఏపీ మంత్రి పరిటాల సునీత తనయుడు శ్రీరామ్ వివాహానికి కేసీఆర్ హాజరవుతున్నారని సమాచారం. ఇటీవలే సునీత తెలంగాణ సీఎంను కలిసి వివాహానికి ఆహ్వానించారు.

అక్టోబర్ ఒకటో తేదీన శ్రీరామ్ వివాహం జరగనుంది. ఈపెళ్లికి కేసీఆర్ హాజరవుతారని.. భద్రతా ఏర్పాట్లు చూడాలని అనంతపురం జిల్లా పోలీసులకు సమాచారం అందినట్టుగా తెలుస్తోంది. ఆసక్తికరమైన అంశం ఏమిటంటే.. మూడు గంటల్లోనే కేసీఆర్ ఆ పెళ్లికి వచ్చేస్తారట. ప్రత్యేక విమానంలో కేసీఆర్ పుట్టపర్తిలో ల్యాండ్ అవుతారని, అక్కడ నుంచి వెంకటాపురానికి హెలీకాఫ్టర్ లో వెళ్తారని తెలుస్తోంది.

పెళ్లిలో కాసేపు గడిపి.. వెంటనే హెలీకాఫ్టర్లో పుట్టపర్తికి బయల్దేరతారని, మళ్లీ పుట్టపర్తిలో విమానం ఎక్కి హైదరాబాద్ చేరుకుంటారని సమాచారం. స్థూలంగా మూడు గంటల సేపటిలోనే కేసీఆర్ హైదరాబాద్ నుంచి అనంతపురం జిల్లా వెంకటాపురానికి వెళ్లి పెళ్లి చూసుకుని వస్తారని సమాచారం.