నాడు ఎన్టీఆర్.. నేడు కేసీఆర్!

కేంద్ర ప్రభుత్వం తెలంగాణపై ఒక రకమైన వివక్ష... ఆంధ్రప్రదేశ్‌పై మరో రకమైన వివక్ష చూపుతోందని డిప్యూటీ సీఎం కడియం శ్రీహరి విమర్శించారు. ఏపీకి ప్రత్యేక హోదా కోరుతున్నా కేంద్రం సహకరించడంలేదని ఆయన అన్నారు. ఏపీకి ప్రత్యేక హోదాను థర్డ్‌ ఫ్రంట్‌ ద్వారా సాధించుకోవచ్చని సూచించారు. సోమవారం (మార్చి 5) హన్మకొండలో మంత్రి చందులాల్‌తో కలిసి ఆయన మీడియాతో మాట్లాడారు. ఈ సందర్భంగా మాట్లాడుతూ ప్రజలు ఎదుర్కొంటున్న సమస్యలను పరిష్కరించడంలో బీజేపీ, కాంగ్రెస్‌ ఘోరంగా విఫలమయ్యాయని అన్నారు.

దేశంలో ఏర్పడబోయే తృతీయ ‌ఫ్రంట్‌కు నాయకత్వం వహించే సత్తా కేసీఆర్‌కే ఉందని కడియం దీమా వ్యక్తం చేశారు. థర్డ్ ఫ్రంట్‌కు ఏపీ సీఎం చంద్రబాబు నాయుడు కూడా మద్దతు ఇవ్వాలని కోరారు. నాడు ఎన్టీఆర్‌ ఆంధ్రప్రదేశ్‌కు జరిగిన అన్యాయాన్ని,‌ తెలుగు ప్రజల వాణిని ఢిల్లీలో ఎలుగెత్తి చాటారని.. నేడు కేసీఆర్‌ మళ్లీ అదే చేయబోతున్నారని కడియం అన్నారు. తెలుగు ప్రజలంతా కేసీఆర్‌కు మద్దతుగా నిలవాలని కోరారు.

జాతీయ రాజకీయాల వైపు వేగంగా పావులు కదుపుతున్న కేసీఆర్
అవసరమైతే జాతీయ రాజకీయాల్లోకి రావడానికి సిద్ధమని ప్రకటించిన కేసీఆర్‌.. ఆ దిశగా వేగంగా పావులు కదుపుతున్నారు. జాతీయ స్థాయిలో వివిధ సంస్థలు, సంఘాలు, వ్యక్తులతో సమావేశం కావడానికి కార్యాచరణ ప్రణాళిక సిద్ధం చేస్తున్నారు. తొలుత కేంద్ర ప్రభుత్వంలో కీలక పాత్ర పోషించిన రిటైర్ట్ ఐఏఎస్, ఐపీఎస్, ఐఎఫ్‌ఎస్, ఐఆర్‌ఎస్ అధికారులతో ఆయన భేటీ కానున్నారు.

న్యాయవాదులు, ఉద్యోగ సంఘాల నేతలు, ఆర్థిక వేత్తలు, మీడియా సంస్థలు, పాత్రికేయులు, పారిశ్రామిక, కార్మిక, రైతు సంఘాల సభ్యులతో వరసగా భేటీ కానున్నారు. హైదరాబాద్‌తో పాటు ఢిల్లీ, ముంబై, చెన్నై, కోల్‌కతా, బెంగళూరు లాంటి నగరాల్లో కేసీఆర్ సమావేశాలు నిర్వహించనున్నట్లు తెలుస్తోంది.