KCR Swearing-in Ceremony: నేడే కేసీఆర్‌ ప్రమాణస్వీకారం.. వారం రోజుల్లో కేబినెట్ కూర్పు

తెలంగాణ రాష్ట్ర రెండో ముఖ్యమంత్రిగా టీఆర్ఎస్ అధినేత కేసీఆర్ గురువారం బాధ్యతలు చేపట్టనున్నారు. రాజ్‌భవన్‌లో మధ్యాహ్నం 1.25 గంటలకు ముఖ్యమంత్రిగా ఆయన ప్రమాణస్వీకారం చేయనున్నారు. కేసీఆర్‌తో గవర్నర్ ఈఎస్ఎల్ నరసింహన్ ప్రమాణం చేయించనున్నారు. ప్రస్తుతానికి కేసీఆర్ మాత్రమే ప్రమాణంస్వీకారం చేస్తున్నారు. జిల్లాలు, సామాజిక వర్గాల కూర్పు అనంతరం వారంలోపు పూర్తిస్థాయి మంత్రివర్గం కొలువుదీరనుంది. రాజ్యాంగం ప్రకారం తెలంగాణలో సీఎంతో పాటు 17 మంది మంత్రులు ఉండాలి. కాబట్టి మంత్రుల ఎంపికపై కేసీఆర్ కసరత్తు చేస్తున్నారు.

గురువారం మంచి ముహూర్తం ఉండటంతో కేసీఆర్ ప్రమాణం చేస్తున్నారు. ఇంత తక్కువ సమయంలో కేబినెట్ కూర్పు కుదరకపోవడంతో ఆయన ఒక్కరే ప్రమాణ స్వీకారం చేయాలని నిర్ణయించారు. కొత్తగా ఎంపికైన టీఆర్ఎస్ ఎమ్మెల్యేల సమావేశం బుధవారం తెలంగాణ భవన్‌లో జరిగింది. ఈ సమావేశంలో టీఆర్ఎస్ శాసనసభాపక్ష నేతగా కేసీఆర్‌ను ఏకగ్రీవంగా ఎన్నుకున్నారు. టీఆర్ఎస్‌ఎల్పీ నేతగా కేసీఆర్‌ను ఎన్నుకునే తీర్మానాన్ని ఆలేరు ఎమ్మెల్యే గొంగడి సునీత ప్రవేశపెట్టారు. ధర్మపురి ఎమ్మెల్యే కొప్పుల ఈశ్వర్ బలపరిచారు. అనంతరం టీఆర్ఎస్ ఎమ్మెల్యేలు ఏకగ్రీవంగా తీర్మానాన్ని ఆమోదించారు.

ఈ తీర్మానం ప్రతిని పార్టీ ప్రతినిధులు రాజ్‌భవన్‌కు వెళ్లి గవర్నర్‌కు అందజేశారు. నూతన ప్రభుత్వ ఏర్పాటుకు తమ పార్టీని ఆహ్వానించాలని కోరారు. ఇందుకు గవర్నర్‌ అంగీకరించారు. ఈ మేరకు టీఆర్‌ఎస్‌ ఆధ్వర్యంలో కొత్త ప్రభుత్వ ఏర్పాటులో భాగంగా కేసీఆర్‌ ఒక్కరే ముఖ్యమంత్రిగా గురువారం ప్రమాణ స్వీకారం చేయాలని నిర్ణయించారు. కాగా, తెలంగాణ రెండో శాసనసభ తొలి సమావేశాలను ఏర్పాటు చేసి కొత్త ఎమ్మెల్యేల ప్రమాణం, స్పీకర్‌, డిప్యూటీ స్పీకర్‌ ఎన్నిక పూర్తి చేసుకున్న తరవాత కేబినెట్‌లో ఇతర మంత్రుల ప్రమాణ స్వీకార కార్యక్రమం ఉండే అవకాశం ఉందని తెలుస్తోంది.