సామాజిక న్యాయం ద్వారానే అభివృద్ధి: కేరళ సీఎం

సీపీఎం మహాజన పాదయాత్ర ముగింపు సభకు విచ్చేసిన కేరళ సీఎం పినరయి విజయన్ సామాజిక న్యాయం ద్వారానే అభివృద్ధి జరుగుతుందని స్పష్టం చేశారు. సరూర్ నగర్ స్టేడియంలో మహాజన పాదయాత్ర ముగింపు సభకు ఆయన ముఖ్యఅతిథిగా విచ్చేశారు. ఈసందర్భంగా ఆయన మాట్లాడుతూ... మహాజన పాదయాత్ర భారత దేశ మెజారిటీ ప్రజల బతుకుల్లో మార్పు కోసం, సామాజిక న్యాయం కోసం కొత్త మలుపు అవుతుందన్నారు. మహాజన పాదయాత్ర నిర్వహించిన తమ్మినేని బృందానికి అభినందనలు తెలియచేస్తున్నట్లు పేర్కొన్నారు.

పాదయాత్ర విజయవంతం కావడం అనేది సామాజిక న్యాయానికి కట్టుబడి ఉందని చెప్పడానికి ఇదొక గొప్ప ఉదహరణ అని తెలిపారు. సమాజంలో మార్పులు రావాల్సి ఉందని, అట్టడుగున ఉన్న వారి సమస్యలు పరిష్కరించాలని ఇవన్నీ క్షేత్రస్థాయిలో వెళితే తెలుస్తుందన్నారు. అట్టడుగున్న వారి అభివృద్ధి కాకపోతే అది అభివృద్ధి అనరని తెలిపారు.

విభజన జరిగిన అనంతరం విధానాలు మారలేదని, అంతకుముందున్న సమస్యలు..విధానాలు పునరావృతమయ్యాయన్నారు. సబ్ ప్లాన్ ప్రజలకు ఇచ్చిన వాగ్ధానాలు అమలు కావడం లేదని, సబ్ ప్లాన్‌ల ద్వారానే నిజమైన అభివృద్ధి జరుగుతుందన్నారు.

కేంద్రంలో ఉన్న మోడీ ప్రభుత్వం మరింత వినాశకర విధానాలు అవలింబిస్తోందని, కార్పొరేట్ వర్గాలకు అనుకూలంగా వ్యవహరిస్తోందని ఈ ప్రభుత్వ హాయాంలో కాషాయ బీభత్సం జరుగుతోందని, ముఖ్యంగా మైనార్టీ వర్గాలపై జరుగుతోందన్నారు. ఎలా ఉండాలి..ఏమి తినాలి..ఇతరత్రా వాటిపై మాట్లాడుతున్నారని, పశువుల వ్యాపారాన్ని కూడా అనుమతించడం లేదని పేర్కొన్నారు.

గోవా, మణిపూర్ లలో అనైతికంగా పాలన చేపట్టారని, యూపీలో గతంలో కంటే ఈసారి ఓటింగ్ శాతం తగ్గిందన్నారు. కేరళలో ప్రభుత్వం దీర్ఘకాలిక పథకాలు అమలు చేస్తూ అందరికీ ఆరోగ్యం అందే విధంగా చర్యలు చేపడుతున్నట్లు తెలిపారు. ఈ సభకు కేరళ సీఎం సహా పార్టీ సీనియర్ నేత సీతారాం ఏచూరి, పలు వామపక్ష, సామాజిక ప్రజా సంఘాల నేతలు హాజరయ్యారు.