ఖమ్మం మేయర్‌గా పాపాలాల్ డిప్యూటీగా మురళి

ఖమ్మం నగర పాలక సంస్థ మేయర్ గా పాపాలాల్, డిప్యూటీ మేయర్ గా బత్తుల మురళి ప్రమాణ స్వీకారం చేశారు. కార్పొరేషన్ ఎన్నికల్లో తెరాస విజయఢంకా మోగించిన సంగతి తెలిసిందే. మంగళవారం జిల్లా కలెక్టర్ లోకేశ్ కుమార్ ఆధ్వర్యంలో కార్పొరేటర్లు పాపాలాల్ ను మేయర్ గా ఎన్నుకున్నట్టు ప్రకటించారు. కొత్త మేయర్, డిప్యూటీ మేయర్లకు రాష్ట్ర మంత్రులు తుమ్మల నాగేశ్వరరావు శుభాకాంక్షలు తెలిపారు. పాపాలాల్ వృత్తిరీత్యా డాక్టర్. ఆయన ఖమ్మంలో గవర్నమెంట్ ఏరియా ఆసుపత్రి సూపరిటెండెంట్ గా పనిచేశారు. 2009లో కేసీఆర్ ప్రత్యేక రాష్ట్రాన్ని కోరుతూ ఆమరణ నిరాహార దీక్ష చేసినప్పుడు పాపాలాల్ దగ్గరుండి కేసీఆర్ ను చూసుకున్నారు. 2012లో ఉద్యోగ విరమణ చేశారు. తుమ్మల నాగేశ్వరరావు ఆధ్వర్యంలో ఆమన తెరాసలో చేరారు. పాపాలాల్ స్వస్థలం వరంగల్‌లోని డోర్నకల్. 30 ఏళ్లుగా ఖమ్మంలోనే ఉంటున్నారు. మేయర్ పోస్టు ఎస్టీలకు కేటాయించడం పాపాలాల్ కు వరంలా మారింది.