కారు ప్రమాదం నుంచి బయటపడ్డ కోదండరాం

తెలంగాణ జేఏసీ చైర్మన్‌ ప్రొఫెసర్‌ కోదండరామ్.. కారు ప్రమాదం నుంచి తృటిలో బయటపడ్డారు. ఆయన ప్రయాణిస్తున్న కారు ఎదురుగా వస్తున్న బైక్‌ను ఢీకొట్టి.. డివైడర్‌ మీదకు దూసుకెళ్లింది. నల్లగొండ పట్టణంలో ఒక కార్యక్రమానికి హాజరైన కోదండరాం.. హైదరాబాద్ తిరిగొస్తుండగా చిట్యాల మండలం వెలిమనేడు సమీపంలో ఈ ఘటన జరిగింది. బైకుపై ఉన్న ఇద్దరికి తీవ్ర గాయాలయ్యాయి. వీరిని సమీపంలోని ఆసుపత్రికి తరలించి చికిత్స అందిస్తున్నారు. ప్రమాదం కారణంగా విజయవాడ హైవేపై కొద్దిసేపు ట్రాఫిక్‌ నిలిచిపోయింది. సమాచారం అందుకున్న పోలీసులు ఘటనా స్థలికి చేరుకొని పరిస్థితిని చక్కదిద్దారు.

ప్రమాదం నుంచి కోదండరాం సురక్షితంగా బయటపడ్డారని టీజేఏసీ అధికార ప్రతినిధి వెంకట్‌ రెడ్డి తెలిపారు. కారు ప్రమాదానికి గురవగానే బెలూన్‌ తెరుచుకోవడంతో లోపల ఉన్నవారికి ఎలాంటి గాయాలు కాలేదు. పెద్ద ప్రమాదం తప్పడంతో అందరూ ఊపిరి పీల్చుకున్నారు. కోదండరాం మరో వాహనంలో హైదరాబాద్‌ వెళ్లిపోయారు.