BJPలోకి వెళ్తే నేనే సీఎం.. కోమటిరెడ్డి రాజగోపాల్ రెడ్డి సంచలన వ్యాఖ్యలు

మునుగోడు కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి గత కొన్నాళ్లుగా బీజేపీకి అనుకూలంగా మాట్లాడుతున్న సంగతి తెలిసిందే. తెలంగాణలో అధికార టీఆర్‌ఎస్‌కు ప్రత్యామ్నాయం బీజేపీ మాత్రమేనని ఆయన చెబుతున్నారు. రాష్ట్రంలో కాంగ్రెస్ పార్టీ ఇప్పట్లో కోలుకునే అవకాశాలు లేవన్నారు. ఈ ఎమ్మెల్యే మాటలను బట్టి చూస్తే ఆయన బీజేపీలో చేరడం ఖాయమనిపిస్తోంది. కమలం గూటికి చేరబోయే ముందు ఆయన ఆసక్తికర వ్యాఖ్యలు చేశారు.

తెలంగాణలో బీజేపీ అధికారంలోకి వస్తే నేనే సీఎం అవుతానని రాజగోపాల్ రెడ్డి తెలిపారు. అందరం కలిసి బీజేపీలోకి వెళ్తే.. భవిష్యత్తులో తెలంగాణకు నేనే సీఎం అవుతానంటూ ఓ కార్యకర్తతో కోమటిరెడ్డి ఫోన్లో చెప్పారు. రాజగోపాల్ రెడ్డి పార్టీ మారడం ఖాయమని ప్రచారం జరుగుతోన్న నేపథ్యంలో.. ఆయన గెలుపు కోసం పని చేసిన ఓ కార్యకర్త ఫోన్ చేయగా.. రాజగోపాల్ రెడ్డి ఈ వ్యాఖ్యలు చేశారు.

ఎమ్మెల్యే మాటలు లీక్ కావడంతో... తనతోపాటు వీలైనంత ఎక్కువ మంది నేతలను రాజగోపాల్ రెడ్డి బీజేపీలోకి తీసుకెళ్లాలని అనుకుంటున్నారని భావిస్తున్నారు. వాస్తవానికి కోమటిరెడ్డి రాజగోపాల్ రెడ్డి టీపీపీసీ పదవి తమ కుటుంబానికి దక్కాలని ఆశించారు. కానీ పీసీసీ చీఫ్‌గా ఉత్తమ్‌ను కొనసాగించడానికే కాంగ్రెస్ పార్టీ నిర్ణయించింది. ఈ నేపథ్యంలో రాజగోపాల్ రెడ్డి పార్టీ మారడం ఖాయమే.