ఒకర్ని మించి ఒకరు.. తెలంగాణ అన్నాచెల్లెళ్లు!

నిజామాబాద్ జిల్లాలోని ఆర్మూర్‌లో ఏర్పాటు చేసిన ‘టీఆర్ఎస్ జనహిత ప్రగతి సభ’ అద్భుతానికి వేదికైంది. తెలంగాణ అన్నాచెల్లెళ్లు.. తొలిసారిగా అధికారికంగా ఒకే వేదికను పంచుకున్నారు. ముఖ్యమంత్రి కేసీఆర్ కుమారుడు, కుమార్తె.. కల్వకుంట్ల తారక రామారావు, కవిత ఈ సభకు ప్రత్యేక ఆకర్షణగా నిలిచారు. నిజామాబాద్ ఎంపీగా కవిత, రాష్ట్ర ఐటీ, మున్సిపల్ శాఖ మంత్రిగా కేటీఆర్ సభకు హాజరై ప్రసంగించారు. వారిద్దరినీ ఒకే వేదికపై చూసి.. జనంతో పాటు, కార్యక్రమానికి హాజరైన నేతలు కూడా హర్షం వ్యక్తం చేశారు.

ఈ సభలో కేటీఆర్ మాట్లాడుతూ.. తన చెల్లెలు కవితను పొగడ్తల్లో ముంచెత్తారు. భారత పార్లమెంట్‌లో బాగా ప్రసంగించగలిగే అయిదుగురు ఎంపీల్లో కవిత ఒకరని, ఈ విషయాన్ని డిల్లీ పెద్దలే తనతో అన్నారని ఆయన తెలిపారు. అందుకే కవితను చూస్తే.. తనకు గర్వంగా ఉందని ఆయన వెల్లడించారు. అయినా.. ఆమెను ‘ఎంపీ గారు’ అని సంబోధించడానికి బదులు.. ‘కవిత’ అని సంబోధించడమే తనకు ఇష్టమని, చిన్ననాటి నుంచి తనతో ఉన్న అనుబంధమే దానికి కారణమని ఆయన అన్నారు. చాలా మంది తమను చూసి.. తండ్రి కేసీఆర్ పిల్లలిద్దరికీ రాజకీయాల్లో బాగా శిక్షణ ఇచ్చారని అంటారని, కానీ.. తెలంగాణ ఉద్యమమే తమకు అన్నీ నేర్పించిందని ఆయన పేర్కొన్నారు.

అంతకుముందు సభలో మాట్లాడిన స్థానిక ఎమ్మెల్యే జీవన్ రెడ్డి, ఎంపీ కవిత.. నిజామాబాద్‌కు సంబంధించిన సమస్యల గురించి మంత్రి దృష్టికి తీసుకొచ్చారు. ఈ సందర్భంగా ఎంపీ కవిత మాట్లాడుతూ.. ‘నిజామాబాద్ ప్రజల సమస్యల పరిష్కారానికి మంత్రి రామన్న.. తన ప్రసంగంలో తగిన హామీలు ఇస్తారని ఆశిస్తున్నాను’ అని అనడంతో సభలో నవ్వులు విరిశాయి. అన్నాచెల్లెళ్లిద్దరూ ఒకర్ని మించి ఇంకొకరు మాట్లాడటంతో సభికులు ఆసక్తిగా వినడం గమనార్హం. ఈ సభకు ఎంపీలు డీఎస్, బీబీ పాటిల్ తదితరులతో పాటు నిజామాబాద్ జిల్లా టీఆర్‌ఎస్ నేతలు భారీగా హాజరయ్యారు. సభలో జిల్లా నేతలు మంత్రి కేటీఆర్‌ను ఘనంగా సత్కరించారు.