‘భరత్ అనే నేను‌కు కేటీఆర్ డబ్బులిచ్చారు’

ఇటీవల విడుదల అయిన ‘భరత్ అనే నేను’ సినిమా రూపకర్తలకు తెలంగాణ మంత్రి కేటీఆర్ డబ్బులు ఇచ్చారని, హీరో పేరు ‘భరత్ రామ్’ అని పెట్టడానికి కేటీఆర్ ఫండింగ్ చేశారని ఆరోపించారు తెలంగాణ కాంగ్రెస్ నేత ఎ.రేవంత్ రెడ్డి. ఈ సినిమా ప్రమోషన్‌ కార్యక్రమాల్లో కేటీఆర్ పాల్గొనడానికి కూడా అదే కారణమని రేవంత్ వ్యాఖ్యానించారు. సీఎం అయిన హీరో పేరులో తన పేరు కలిసి వచ్చేందుకు కేటీఆర్ డబ్బులిచ్చారని రేవంత్ అన్నారు. రేపటి ఎన్నికల్లో తెలంగాణలో తెరాస ఓడిపోతుందని, ఆ తర్వాత కేటీఆర్ యాంకరింగ్ చేసుకోవాల్సిందే.. అని రేవంత్ వ్యాఖ్యానించారు.

కర్ణాటక అసెంబ్లీ ఎన్నికల సమయంలో ఆ రాష్ట్రానికి వెళ్లిన తెలంగాణ ముఖ్యమంత్రి, టీఆర్ఎస్ అధినేత కేసీఆర్.. అక్కడ జేడీఎస్‌కు మద్దతు పలికారని, జేడీఎస్‌కు ఓటేయాలని అక్కడి తెలుగు వారికి పిలుపునిచ్చారని, ఇప్పుడు జేడీఎస్ ఎవరితో పొత్తు పెట్టుకోవాలో కేసీఆర్ చెప్పాలని.. రేవంత్ వ్యంగ్యంగా వ్యాఖ్యానించారు. కర్ణాటకలో కాంగ్రెస్, జేడీఎస్‌లు కలిసి సాగుతున్న వైనాన్ని ప్రస్తావిస్తూ, ఇప్పుడు అక్కడ ఏం జరుగుతోందో.. రేపు దేశమంతా అదే జరుగుతుంది అని రేవంత్ అన్నారు.

కాబట్టి కేసీఆర్ ఎటు వైపు ఉంటారో తేల్చుకోవాలని రేవంత్ వ్యాఖ్యానించారు. కర్ణాటకలో అక్రమ పద్ధతిలో అధికారంలోకి రావాలని బీజేపీ ప్రయత్నాలు చేస్తోందని రేవంత్ ఆరోపించారు.