డాడీని తెలంగాణ ఉద్యమంలోకి లాగొద్దు ప్లీజ్!

తెలంగాణ ముఖ్యమంత్రి కల్వకుంట్ల చంద్రశేఖర్ రావు తనయుడు, మంత్రి కల్వకుంట్ల తారకరామారావు తెలంగాణ ఉద్యమం పట్ల నిరాసక్తత ప్రదర్శించారా? తెలంగాణ రాష్ట్ర ఏర్పాటు కోసం పార్టీ పెట్టేందుకు కేసీఆర్ సమాయత్తమవుతున్న సమయంలో విదేశాల్లో చదువుకుంటున్న కేటీఆర్.. ‘డాడీ టైం వేస్ట్ చేయొద్దు’ అంటూ తన తండ్రి సన్నిహితులకు సూచించారా? ‘మా నాన్నను ఉద్యమంలోకి లాగొద్దు ప్లీజ్’ అంటూ రిక్వెస్ట్ చేశారా?... తెలంగాణ రాష్ట్రసమితి (టీఆర్ఎస్) వ్యవస్థాపక సభ్యుడు, అప్పట్లో కేసీఆర్‌కు ఉద్యమ సహచరుడుగా కొనసాగిన గాదె ఇన్నారెడ్డి అలియాస్ ఇన్నయ్య మాత్రం అవుననే అంటున్నారు.

‘మీ తండ్రి కేసీఆర్‌ గారు డిప్యూటీ స్పీకర్‌గా ఉన్నప్పుడు నువ్వు అమెరికాలో ఉండి నాకు ఫోన్ చేసి ఏం మాట్లాడావో ఒక్కసారి గుర్తు చేసుకో’ అంటూ గాదె ఇన్నారెడ్డి బుధవారం తన ఫేస్‌బుక్ ఖాతాలో పోస్ట్ చేశారు.

అంతేకాదు గురువారం ‘అంకుల్, డాడీ టైం వేస్ట్ చేయకండి. నేనూ మా చెల్లె ఇద్దరం పెళ్లి కానోళ్లం. మా డాడీని ఉద్యమంలోకి లాగొద్దు ప్లీజ్’ అని కేటీఆర్ తనతో రిక్వెస్ట్ చేసినట్లు ఇన్నారెడ్డి కామెంట్ రాశారు. ఇన్నారెడ్డి కామెంట్లు సోషల్ మీడియాలో వైరల్ అయ్యాయి.




మాజీ నక్సలైట్ అయిన ఇన్నారెడ్డి.. టీఆర్ఎస్ పార్టీలో కొనసాగారు. కేసీఆర్ తో విబేధించి.. కొంతకాలం పాటు సినీ నటి విజయశాంతి స్థాపించిన ‘తల్లి తెలంగాణ పార్టీ’లో కొనసాగారు. ఆ తర్వాత ఆ పార్టీని కూడా వీడి.. ప్రత్యక్ష రాజకీయాలకు దూరంగా ఉన్నారు. పదేళ్ల క్రితం వరంగల్ లో ‘మా ఇల్లు’ పేరుతో అనాథపిల్లలకు విద్యాలయం నిర్మించి ఉచితంగా విద్య,వసతి కల్పిస్తున్నారు.

కేసీఆర్ టీఆర్ఎస్ స్థాపించిక కొన్నాళ్లకు ఆయన తనయుడు కేటీఆర్, కుమార్తె కవితలు పార్టీలో యాక్టీవ్ గా పనిచేసిన సంగతి తెలిసిందే.