కేటీఆర్ అసలు పేరు అది: రేవంత్‌రెడ్డి

తెలంగాణ ముఖ్యమంత్రి కేసీఆర్ పై తెలంగాణ టీడీపీ వర్కింగ్ ప్రెసిడెంట్ రేవంత్ రెడ్డి విరుచుకుపడ్డారు. తీవ్రమైన మాటలతో కూడిన విమర్శలతో వేడినిపుట్టించారు రేవంత్ రెడ్డి. కేసీఆర్ ను విమర్శిస్తూనే.. కేటీఆర్ ను టార్గెట్ గా చేసుకున్నారీయన. ప్రత్యేకించి కేటీఆర్ కు అసలు పేరు అది కాదు.. అని రేవంత్ వ్యాఖ్యానించడం గమనార్హం.

‘కేటీఆర్ అసలు పేరు తారక రామారావు కాదు. కేటీఆర్ కు కేసీఆర్ మొదట పెట్టుకున్న పేరు అజయ్. అయితే.. తెలుగుదేశం పార్టీలో టికెట్ సంపాదించుకోవడానికి కేసీఆర్ కొడుకు పేరు మార్చారు. అజయ్ అనే పేరును తీసి, తారకరామారావు అనే పేరు పెట్టారు.. ఆ పేరు పెడితే ఎన్టీఆర్ ను ప్రసన్నం చేసుకోవచ్చని.. కొడుకు పేరు మార్చారు..’ అని రేవంత్ రెడ్డి వ్యాఖ్యానించారు.

అలాగే హైదరాబాద్ లో నూతన సచివాలయ నిర్మాణానికి కేసీఆర్ చేస్తున్న ప్రయత్నాల పట్ల కూడా రేవంత్ రెడ్డి విరుచుకుపడ్డారు. ఇదంతా కేసీఆర్ వాస్తు పిచ్చి మేరకు, తనయుడిని సీఎం చేసుకోవడానికి చేస్తున్న ప్రయత్నం అని రేవంత్ ఆరోపించారు.

‘ఇప్పటి వరకూ ఈ సచివాలయంలో 16 మంది సీఎంలు పని చేస్తే..వారి కొడుకులు ఎవ్వరూ కూడా సీఎంలు కాలేదు.. అందుకే కేసీఆర్ నూతన సచివాలయాన్ని నిర్మించాలని అనుకుంటున్నారు.. ఆయన వాస్తు నమ్మకంతో, తనయుడి కోసం కోట్ల రూపాయల ప్రజాధనాన్ని వ్యర్థం చేయడానికి ప్రయత్నిస్తున్నారు..’ అని రేవంత్ రెడ్డి ఆరోపించారు.