పెళ్లి చేసుకుంటావా అని ఎన్టీఆర్ ప్రపోజ్ చేశారు!

నేను ఏమన్నా పెద్ద అందగత్తెనా ఎన్టీఆర్‌ని ఆకర్షించడానికి? అంటూ టీడీపీ వ్యవస్థాపకుడు, దివంగత ఎన్టీఆర్ భార్య లక్ష్మీపార్వతి ఓ ఇంటర్వ్యూలో వ్యాఖ్యానించారు. ఓ చానల్‌కు ఇచ్చిన ఇంటర్వ్యూలో ఆమె మాట్లాడుతూ... ఎన్టీఆర్ నటించిన సామ్రాట్ అశోక చిత్రం షూటింగ్ జరుగుతుంటే ఓసారి అక్కడికి వెళ్లానని అన్నారు. షూటింగ్ గ్యాప్‌లో ఎన్టీఆర్‌, హీరోయిన్ లక్ష్మీ అక్కడ కూర్చుని ఉన్నారని గుర్తుచేసుకున్నారు. ‘స్వామీ! నేను వెళ్లొస్తా’ అని చెప్పి వస్తుంటే వెంటనే, అక్కడి నుంచి వచ్చిన ఆయన ‘మళ్లీ ఎప్పుడొస్తున్నారు?’ అని అడిగారని తెలిపారు.

ఎన్టీఆర్ అలా అడగడం ఎలా ఉందంటే! ఓ తల్లి ఊరెళుతుంటే పిల్లలు అడిగినట్టుగా ఉంది. నేను వెళ్తుండటంతో ఆయనలో బాధ, నైరాశ్యం కలిగాయి...అప్పటికే, నాపై ఇంత ఆత్మీయత పెంచుకున్నారా! అనిపించిందని లక్ష్మీపార్మతి పేర్కొన్నారు. ఇలాంటి పరిస్థితుల్లో ఎన్టీఆర్ కోరుకుంటే లక్ష్మీపార్వతే కాదు, ఏ స్త్రీ అయినా వస్తుంది. నేనేమన్నా పెద్ద అందగత్తెనా ఆయన్ని ఆకర్షించడానికి లేక, నా వెనుక ఏదైనా రాజకీయం ఉందా? ఆయనకు ఉపయోగపడుతుందని అనుకోవడానికి అని ఆమె అన్నారు.

క్రమేపీ మా మధ్య అనుబంధం బలపడటంతో నా సహచర్యంలో ఎన్టీఆర్ రిలాక్స్ అయ్యేవారని తెలిపారు. నరసరావుపేటలో నేను ఉండే ఇంటికి ఎన్టీఆర్ ఫోన్ పెట్టించారు... ఆ ఫోన్ బిల్లు రూ.3 లక్షలు ఆయన కట్టారంటే, మా మధ్య ఎంత అనుబంధం ఉందో అర్థంచేసుకోవచ్చని అన్నారు. ఓ రోజు నాచారం స్టూడియోలో ఎన్టీఆర్ ఏమన్నారంటే..నువ్వు ఒంటరినంటున్నావు..నేనూ ఒంటరినే. మన మధ్య ఆత్మీయత ఏర్పడింది కదా! మనమెందుకు పెళ్లి చేసుకోకూడదని మొదటిసారి తనకు ప్రపోజ్ చేశారని ఆమె తెలియజేశారు. అయితే దీనికి కొంత టైమ్ కావాలని తాను కోరినట్లు చెప్పారు. సరే, నీ ఇష్టమని ఆయన అన్నారు. రెండు రోజులు ఆలోచించిన తర్వాత ఎన్టీఆర్ కి ఫోన్ చేసి నా మొదటి భర్త నుంచి విడాకులు తీసుకోబోతున్నాను అని చెప్పాను’ అంటూ లక్ష్మీపార్వతి వెల్లడించారు.