ఎన్టీఆర్‌పై సినిమా.. నారా లోకేష్ కామెంట్!

ఎన్టీఆర్ బయోపిక్ ను ఇస్తానని దర్శకుడు రామ్ గోపాల్ వర్మ ప్రకటించడంపై ఎన్టీఆర్ మనవడు, ఏపీ మంత్రి నారా లోకేష్ స్పందించారు. ఎన్టీఆర్ బయోపిక్ లో తన మామ, నటుడు బాలయ్య నటించాలని లోకేష్ ఆకాంక్షించారు. అప్పుడే సినిమా బాగుంటుందన్నారు. బాలయ్య ఉండగా ఎన్టీఆర్ పై సినిమా గురించి ఆందోళన లేదు అని లోకేష్ వ్యాఖ్యానించారు. బాలయ్య ఆధ్వర్యంలో ఆ సినిమా బాగా రూపొందుతుందనే అభిప్రాయన్ని వ్యక్తం చేశారు.

ఈ సినిమాపై బాలయ్యే నిర్ణయం తీసుకుంటాడని, బాలయ్య నిర్ణయానికి తమ మద్దతు ఉంటుందని లోకేష్ అన్నారు. ఎన్టీఆర్ పై సినిమాను రూపొందిస్తానని వర్మ ప్రకటించిన తర్వాత ఇప్పటికే నందమూరి లక్ష్మీ పార్వతి స్పందించారు. ఎన్టీఆర్ పాత్రను బాలయ్య చేస్తాడనే ప్రచారం పట్ల ఆమె మండిపడ్డారు. ఎన్టీఆర్ పాత్రకు బాలయ్య సూటు కాడని ఆమె అన్నారు. ఆ పాత్రను కమల్ హాసన్ చేస్తే బావుంటుందనే అభిప్రాయాన్ని వ్యక్తం చేశారు.

మరి ఎన్టీఆర్ బయోపిక్ తీస్తానని, అందులో తనే ఎన్టీఆర్ గా నటిస్తానని ఇది వరకే బాలయ్య ప్రకటించాడు. అయితే ఆ సినిమాకు వర్మ దర్శకత్వం వహిస్తాడని మాత్రం ఆయన ఇంత వరకూ చెప్పలేదు.