​లోకేష్ కోరిక తీరడానికి ముహూర్తం ఫిక్సయ్యిందా..!

అన్నీ కుదిరితే ఉగాది రోజున మంత్రిగా ప్రమాణ స్వీకారం చేయాలని భావించారు నారా లోకేష్ బాబు. తెలుగు సంవత్సరాది రోజున పదవిని చేపట్టాలని అనుకున్నారు. మంత్రి పదవిని చేపట్టడానికి చాలా ఉత్సాహంగా ఉన్న ఆయన కోరికను తీర్చడానికి తండ్రి, ముఖ్యమంత్రి చంద్రబాబు కూడా సానుకూలంగా ఉన్నారు. అందుకోసమని లోకేష్ ను ఎమ్మెల్సీ ఎన్నుకున్నారు. ఇప్పటికే ఆ ఎన్నిక లాంఛనంగా పూర్తి అయ్యింది. అయితే లోకేష్ ఇంకా ఎమ్మెల్సీగా ప్రమాణ స్వీకారం చేయాల్సి ఉంది.

ప్రమాణ స్వీకారం చేయకున్నా... మంత్రిగా బాధ్యతలు స్వీకరించడానికి అవకాశాలున్నాయి. మరి దీని కోసం ముందుగా ఉగాది రోజును ముహూర్తంగా నిర్ణయించినా, ఆ వేడుక స్వల్ప వాయిదా పడిందని సమాచారం. మార్చి 28 వ తేదీ వరకూ అసెంబ్లీ సమావేశాలు ఉండటం వంటి కారణాల చేత ఉగాది రోజున మంత్రి వర్గ విస్తరణ ఉండబోదని తెలుస్తోంది.

మంత్రి వర్గ పునర్వ్యస్థీకరణకు సంబంధించిన ప్రమాణస్వీకారోత్సవం ఏప్రిల్ ఆరుకు వాయిదా పడినట్టుగా ఏపీ పొలిటికల్ సర్కిల్స్ లో ప్రచారం జరుగుతోందిప్పుడు. ఇప్పటికే చాన్నాళ్లు వార్తల్లో ఉన్న వ్యవహారానికి బాబు ఆవిధంగా ముగింపును ఇవ్వాలని భావిస్తున్నారట. ఈ విస్తరణ లో లోకేష్ కు మంత్రి పదవి దక్కడం ఖాయమయినప్పటికీ, మిగతా వాళ్లలో ఎవరు ఉంటారు, ఎవరు ఊడతారు? అనేది మాత్రం ఇంకా మిస్టరీగానే ఉంది. భూమా అఖిలప్రియను మంత్రి వర్గంలోకి తీసుకుంటారా లేదా అనేది కూడా అందరిలోనూ ఆసక్తిని రేకెత్తిస్తోంది.