శంషాబాద్‌లో భారీ అగ్ని ప్రమాదం

హైదరాబాద్ శివారు శంషాబాద్ మండల కేంద్రంలో బుధవారం తెల్లవారుజామున భారీ అగ్ని ప్రమాదం చోటుచేసుకుంది. శంషాబాద్‌లోని అనుపమ రెసిడెన్సీ లాడ్జ్‌లో ఈ అగ్ని ప్రమాదం జరిగింది. 8 అంతస్తుల ఈ భవనం మొదటి అంతస్తులో షార్ట్ షర్క్యూట్ కారణంగా మంటలు వ్యాపించినట్లు తెలుస్తోంది. ఈ మంటలు మొదటి, రెండో అంతస్తులకు వ్యాపించాయి. దీంతో మూడో అంతస్తులో ఉన్న పర్యాటకులు భయంతో టెర్రస్ పైకి వెళ్లిపోయారు. ప్రమాద స్థలానికి చేరుకున్న అగ్నిమాపక సిబ్బంది మంటలను పూర్తిగా అదుపులోకి తీసుకొచ్చారు. టెర్రస్‌పై ఉన్న 30 మందిని లేడర్ సహాయంతో అగ్నిమాపక సిబ్బంది కిందికి దించారు.

లాడ్జ్‌లో అందరూ నిద్రలో ఉండగా ఈ ప్రమాదం జరిగింది. దీంతో ప్రమాదాన్ని గమనించడం ఆలస్యమైంది. ఒకటి, రెండు అంతస్తులకు మంటలు పూర్తిగా వ్యాపించిన తరవాత లాడ్జ్‌లో అద్దెకు దిగిన పర్యాటకులు గమనించారు. మంటలు ఎగిసిపడుతుండటంతో వారు కిందికి రాలేకపోయారు. భయంతో పై అంతస్తులకు పరుగుతు తీశారు. లాడ్జ్ భవనానికి మెట్ల మార్గం ఉన్నప్పటికీ అక్కడ కూడా మంటలు వ్యాపించడంతో అందులో ఉన్నవారు భయంతో పైకి పరుగులు తీశారని అగ్నిమాపక సిబ్బంది వెల్లడించారు. కాగా.. ప్రమాదంలో భవనం మొదటి, రెండు అంతస్తుల్లో ఉన్న ఫర్నీచర్ కాలి బూడిదైంది. భవనం పరిసరాల్లో దట్టమైన పొగ అలుముకుంది.