తప్పు కొడుకుది.. శిక్ష తండ్రికి.. పరిస్థితి విషమం!

కొడుకు తప్పు చేస్తే తండ్రిని చెట్టుకు కట్టేసి అవమానించారు. మనస్తాపం చెందిన ఆ తండ్రి పురుగుమందు తాగాడు. పశ్చిమగోదావరి జిల్లా టి. నర్సాపురం మండలం సాయంపాలెంలో ఈ ఘటన చోటుచేసుకొంది. గ్రామానికి చెందిన నాగేంద్ర అనే యువకుడు ఓ వివాహితతో అసభ్యకరంగా ప్రవర్తించాడు. ఈ విషయాన్ని ఆమె తన భర్తకు చెప్పడంతో ఆయన పంచాయితీ పెద్దల దృష్టికి తీసుకెళ్లాడు. ఈ విషయం తెలుసుకున్న నాగేంద్ర గ్రామం నుంచి పరారయ్యాడు.

నాగేంద్రను అప్పగించాలంటూ అతడి తండ్రి సంజీవరావును గ్రామపెద్దలు ఆదేశించారు. రెండు రోజులు గడుస్తున్నా అతడి జాడ దొరక్కపోవడం, సంజీవరావు ఎలాంటి వివరాలు చెప్పకపోవడంతో.. ఆగ్రహించిన గ్రామస్థులు అతణ్ని తీసుకెళ్లి చెట్టుకు కట్టేశారు.

కొంత మంది గ్రామపెద్దలు సంజీవరావుపై చేయిచేసుకున్నారు. కొడుకును క్రమశిక్షణలో పెట్టుకోవాలంటూ దుర్భాషలాడారు. దీంతో మనస్తాపానికి గురైన సంజీవరావు.. ఇంటికెళ్లి పురుగుల మందు తాగాడు. విషయం తెలుసుకున్న స్థానికులు వెంటనే అతణ్ని సమీపంలోని ఆస్పత్రికి తరలించారు. అపస్మారకస్థితిలోకి చేరుకున్న సంజీవరావు ఆరోగ్య పరిస్థితి విషమించడంతో ఏలూరు ఆస్పత్రికి తరలించి చికిత్స అందిస్తున్నారు.