భద్రాద్రి కొత్తగూడెం: ప్రేమోన్మాది ఘాతుకం.. టీచర్‌ని చంపి ఆత్మహత్య!

భద్రాద్రి కొత్తగూడెం జిల్లాలో ప్రేమోన్మాది ఘాతుకానికి ఒడిగట్టాడు. ప్రవళిక అనే విద్యా వాలంటీర్‌ను కత్తితో పొడిచి హత్య చేశాడు. అనంతరం ఆ యువకుడు పురుగుల మందు తాగి ఆత్మహత్య చేసుకున్నాడు. దమ్మపేట మండలం నెమిలిపేటలో శనివారం (డిసెంబర్ 30) మధ్యాహ్నం ఈ దారుణం జరిగింది. పాఠశాలలోనే తమ టీచర్ దారుణంగా హత్యకు గురవడాన్ని చూసి విద్యార్థులు షాక్‌కు గురయ్యారు. రక్తపు మడుగులో పడిపోయి విలవిల్లాడిన ప్రవళిక అందరూ చూస్తుండగానే కన్నుమూసింది.

నిందితుడు వనమా శ్రీనివాస్‌కు ప్రవళిక సమీప బంధువు అవుతుందని, తనను పెళ్లి చేసుకోవాలంటూ అతడు ప్రవళికను గత కొంతకాలంగా వేధిస్తున్నాడని స్థానికులు చెబుతున్నారు. పక్కా ప్రణాళికతో దాడి చేసిన శ్రీనివాస్.. దారుణానికి ఒడిగట్టడానికే ముందే పురుగుల మందు తాగి వచ్చినట్లు తెలుస్తోంది. ప్రవళికను పొడిచి చంపిన కాసేపటికి అతడు కూడా అక్కడే కుప్పకూలిపోయి మరణించాడు.

పాఠశాల ఆవరణలోనే క్షణాల వ్యవధిలో రెండు మృతదేహాలు పడి ఉండటాన్ని చూసి స్థానికులు షాక్‌కు గురయ్యారు. ఘటనాస్థలికి చేరుకున్న పోలీసులు మృతదేహాలను స్వాధీనం చేసుకున్నారు. కేసు నమోదు చేసి దర్యాప్తు చేపట్టారు.