రేవంతన్న వచ్చాకే తాళి కడతా... వరుడి మంకుపట్టు

అభిమానుల్లో వీరాభిమానులు వేరు. వారు తమకు నచ్చిన హీరో, రాజకీయ నాయకుడి కోసం ఏమైనా చేస్తారు. అలాంటి వ్యక్తే మహేష్ కూడా. జీవితంలో మధురమైన ఘట్టం పెళ్లి. శుభ ముహూర్తంలో తాళికడితే ఆ జంట సుఖసంతోషాలతో కలిసే ఉంటారని పెద్దలు ముహూర్తాన్ని నిర్ణయిస్తారు. ఆ ముహూర్తాన్ని కూడా తన అభిమాన లీడర్ కోసం పట్టించుకోకుండా వదిలేశాడు మహేష్. తాళికట్టే ముహూర్తం దాటి పోయినా మూడు గంటల పాటూ అలానే పెళ్లిపీటలపై కూర్చున్నాడు కానీ తాళి మాత్రం కట్టలేదు. విస్తుపోవడం పెళ్లికూతురు వంతయ్యింది. ఇంతకీ మహేష్ అంతలా ఎవరికోసం వెయిట్ చేశాడో తెలుసా? టీడీపీ లీడర్ రేవంత్ రెడ్డి కోసం.

రంగారెడ్డి జిల్లా షాద్ నగర్లోని వేపంజర్ల గ్రామానికి చెందిన మహేష్ యాదవ్ టీడీపీకి వీరాభిమాని. అంతేకాదు రేవంత్ రెడ్డి సైన్యంలో సభ్యుడు కూడా. అతనికి పెళ్లి నిశ్చయమైంది. శుక్రవారం పెళ్లి. ఆ పెళ్లికి రేవంత్ రెడ్డిని ఆహ్వానించాడు. అయితే వేరే పనిలో ఉండి రేవంత్ ముహూర్త సమయానికి రాలేదు. దీంతో తాళికట్టనని అన్న వచ్చాకే కడతానని పట్టుబట్టాడు పెళ్లికొడుకు. ఎంత నచ్చజెప్పిన వినకపోవడంతో... టీడీపీకి చెందిన కొందరు షాద్ నగర్ నుంచి హైదరాబాద్ వచ్చి రేవంత్ రెడ్డిని కలిసి విషయం చెప్పారు. రేవంత్ వెంటనే బయల్దేరి పెళ్లికి హాజరయ్యారు. ఆయన వచ్చాక మహేష్ వధువు మెడలో తాళి కట్టాడు. కాకపోతే ఇదంతా జరగడానికి మూడు గంటలు సమయం పట్టింది.