సమస్యలపై లేఖరాసి ఏటీఎంను తగులబెట్టాడు!

ప్రపంచంలోని ప్రజలు ఎదుర్కొంటున్న సమస్యలను పరిష్కరించాలంటూ లేఖ రాసిన ఓ యువకుడు, ఇది సెన్సెషన్ కావాలని ఏకంగా ఏటీఎం మెషీన్‌కు నిప్పంటించాడు. ఈ ఘటన హైదరాబాద్‌లోని కేపీహెచ్‌బీ పోలీస్ స్టేషన్ పరిధిలో ఆదివారం తెల్లవారుజామున చోటుచేసుకుంది. పోలీసులు తెలిపిన వివరాల ప్రకారం...తెల్లవారుజామున 3.25 గంటల ప్రాంతంలో గుర్తుతెలియని ఓ యువకుడు కేపీహెచ్‌బీ ఒకటో ఫేజ్‌లోని ఇండియన్ ఓవర్సీస్ బ్యాంక్ ఏటీఎం‌లోకి ప్రవేశించాడు. అనంతరం ఓ కవర్‌లో రసాయన మిశ్రమాన్ని ఏటీఎంపై ఉంచి, అందులో కేబుల్‌ బయటకు తీసి నిప్పంటించాడు. కేబుల్‌ ద్వారా మంటలకు కారణమయ్యే మిశ్రమానికి నిప్పు అంటుకోవడంతో ఏటీఎం డిస్‌ప్లే, అందులోని రెండు సీసీ కెమేరాలు కాలిపోయాయి.

సీసీటీవీ కెమేరాలు కాలిపోకముందు నమోదైన ఫుటేజీల్లో నిందితుడు ఏటీఎం‌ను ఎలా తగలబెట్టాడో పోలీసులు గుర్తించారు. అందులోని నగదు భద్రంగానే ఉన్నట్లు పోలీసులు తెలిపారు. నిందితుడికి సుమారు 25ఏళ్లు ఉంటాయని, ముఖం కనబడకుండా కర్చీఫ్ చుట్టుకున్నాడని తెలియజేశారు.

ఏటీఎంను తగులబెట్టిన తర్వాత 17 పేజీలతో కూడిన ఓ లేఖను అక్కడ వదిలివెళ్లాడు. ప్రపంచంలోని ప్రజలు చాలా సమస్యలు ఎదుర్కొంటున్నారని, వాటిని పరిష్కరించాలంటూ అందులో పేర్కొన్నాడు. ప్రపంచమంతటా వ్యక్తులకు ఒకే గుర్తింపు సంఖ్య ఉండాలని, కులమత భేదాలు, రిజర్వేషన్లు ఉండకూడదన్న నిందితుడు, ఆకలిచావులను ఆరికట్టే బాధ్యత ప్రభుత్వాలే తీసుకోవాలని కోరాడు. విద్య, వైద్యం, శాంతిభద్రతలు మరింత మెరుగుపడాల్సి ఉందని, పర్యావరణాన్ని పరిరక్షించడానికి చర్యలు తీసుకోవాలని లేఖలో వివరించాడు. ఆత్యాచారాలు పెరిగిపోతున్నందున వాటిని నివారించేందుకు వ్యభిచారాన్ని చట్టబద్ధం చేయాలని, తన లేఖను 24 గంటల్లోగా మీడియాలో ప్రచురించాలని, లేనిపక్షంలో ఆత్మహత్య చేసుకుంటానని బెదిరించాడు. మరోవైపు సీసీ ఫుటేజీని పరిశీలించిన పోలీసులు నిందితుడిని పట్టుకునేందుకు గాలింపు చర్యలు ముమ్మరం చేశారు.