ఎద్దు ఊపిరి తీసిన మామిడికాయ.. గొంతులో ఇరుక్కొని మృతి

మామిడికాయ ఓ ఎద్దు ప్రాణాన్ని బలితీసుకుంది. మామిడికాయ గొంతులో ఇరుక్కొని ఎద్దు ప్రాణాలు విడిచిన హృదయ విదారక ఘటన మంచిర్యాల జిల్లాలో చోటుచేసుకుంది. ఎద్దును కాపాడుకోవడానికి రైతులు చేసిన ప్రయత్నం వృథా అయింది. భీమారం మండలం కాజీపల్లి గ్రామానికి చెందిన రైతు జంగపెల్లి రామయ్యకు చెందిన ఎద్దు సోమవారం (ఏప్రిల్ 29) సాయంత్రం స్థానికంగా ఉన్న ఓ మామిడి తోటలో మేతకు వెళ్లింది. అక్కడ మేత మేస్తూ.. ఓ మామిడికాయను మింగేసింది. అది కాస్త గొంతు భాగంలో ఇరుక్కోవడంతో విలవిల్లాడింది.

విషయం గమనించిన రామయ్య.. సమీపంలో ఉన్న మరికొంత మంది రైతులకు సమాచారం ఇచ్చారు. వారంతా కలిసి ఎద్దు గొంతులో ఇరుక్కున్న మామిడికాయను కక్కించేందుకు తీవ్రంగా శ్రమించారు. కానీ, వారి ప్రయత్నం ఫలితాలనివ్వలేదు. ఊపిరిరాడక ఎద్దు దుర్మరణం పాలైంది. దీంతో రైతు రామయ్య కంటతడి పెట్టారు..