మానవత్వపు గోడకు ‘మరక’

మానవత్వపు గోడ.. వాడుకోని దుస్తులు, మూలన పడి ఉన్న వస్తువులను దానం చేసి మళ్లీ వినియోగంలోకి తేవచ్చని రుజువు చేసిన ఓ మంచి వేదిక. కానీ, ఈ సదాశయానికి కూడా మచ్చ తెచ్చేవిధంగా కొంత మంది ప్రవర్తిస్తున్నారు. ఉపయోగపడనంతగా చితికిపోయిన బట్టలు, పనికిరాని వస్తువులను కూడా ‘వాల్ ఆఫ్ కైండ్‌నెస్’ వద్ద వదిలేస్తున్నారు. మనం ఇచ్చే వస్తువులు ఎదుటివారి అవసరం తీర్చేలా ఉండాలి.. అంతేగానీ ఇలా పనికిరాని వస్తువులను ఇస్తే ఏం లాభం. నిరుపేదలకు దానం చేయడం ద్వారా మనకు చెప్పలేనంత సంతృప్తి కలుగుతుంది. మరి ఇలాంటి వాటివల్ల మనకు ఏం ఒరుగుతుంది?

‘మీకు ఉపయోగం లేనివి ఉంటే ఇక్కడ వదిలేయండి.. మీకు అవసరమైనవి ఇక్కడ నుంచి తీసుకెళ్లండి’ అనే మంచి నినాదంతో జీహెచ్‌ఎంసీ ప్రారంభించిన ‘మానవత్వపు గోడ’ ఎంతో మందికి స్ఫూర్తినిచ్చింది. మరెంతో మందికి తోడుగా నిలిచింది.

భాగ్యనగరంలో మొదలైన ఈ వినూత్న కార్యక్రమం.. ఉద్యమంలా పలు జిల్లాలకు కూడా విస్తరిస్తోంది. ఇలాంటి తరుణంలో దీనికి మచ్చ తీసుకురావడం సరికాదు. వినియోగార్హమైన వస్తువులనే దానం చేసి మరోసారి మన సహృదయాన్ని ఘనంగా చాటుకోవాల్సిన అవసరం ఉంది.