భర్త సినిమాకు వద్దన్నందుకు కాలువలోకి దూకిన భార్య!

భర్త సినిమాకు తీసుకెళ్లడానికి నిరాకరించాడని ఆగ్రహించిన ఓ యువతి ఆవేశంతో కాలువలోకి దూకి ఆత్మహత్యాయత్నానికి పాల్పడింది. విజయవాడలోని వాంబే కాలనీలో నివాసముంటున్న రాజారెడ్డికి ఇటీవల తిరుపతమ్మ అనే యువతితో వివాహమైంది. ఆదివారం కావడంతో సినిమాకు వెళ్దామని భర్తను కోరింది. అయితే తనకు వేరే పనుంది సినిమాకు తరవాత వెళ్దామని రాజారెడ్డి నచ్చజెప్పాడు. కానీ తిరుపతమ్మ వినలేదు. భర్తతో గొడవకు దిగింది. మాటామాటా పెరిగింది. ఇదంతా వారు లెనిన్ సెంటర్ నుంచి రోడ్డుపై నడుచుకుంటూ వెళ్తుండగానే జరిగింది. ధర్నా చౌక్ వద్ద బ్రిడ్జి మీదికి రాగానే తిరుపతమ్మ కాలువలోకి దూకేసింది.

తనకు ఈత రాకపోయినప్పటికీ భార్యను కాపాడాలని రాజారెడ్డి కూడా కాలువలోకి దూకేశాడు. వీరిద్దరూ నీట మునుగుతూ ప్రాణాపాయ స్థితిలోకి వెళ్లిపోతుండగా.. ధర్నాచౌక్ వద్ద విధులు నిర్వహిస్తున్న ఏపీఎస్పీ పోలీసులు ఈ విషయాన్ని గ్రహించారు. వెంటనే శ్రీనివాసరావు అనే కానిస్టేబుల్ కాలువలోకి దూకి దంపతుల ప్రాణాలు కాపాడారు. భార్యభర్తలకు కౌన్సెలింగ్ ఇచ్చి పంపించారు. తన భార్య ఎప్పుడూ తనతో గొడవ పడుతుంటుందని, ఈరోజు అది మరింత ఎక్కువై కాలువలోకి దూకేసిందని రాజారెడ్డి చెప్పాడు. ప్రతి చిన్నదానికి గొడవపడి ఇబ్బందులు తెచ్చిపెడుతుందని ఆరోపించాడు.