స్టేషన్ ఘన్‌పూర్‌లో మెగా లెదర్ పార్క్: కేటీఆర్

తెలంగాణలోని జనగామ జిల్లా స్టేషన్ ఘన్‌పూర్‌లో మెగా లెదర్ పార్క్‌ను ఏర్పాటు చేయనున్నట్లు రాష్ట్ర ఐటీ, పరిశ్రమలు, పురపాలక శాఖ మంత్రి కె. తారకరామారావు స్పష్టం చేసారు. మంగళవారం శాసనసభలో ప్రశ్నోత్తరాల సందర్భంగా కేటీఆర్ మాట్లాడారు. మెగా లెదర్ పార్క్ కోసం స్టేషన్ ఘన్‌పూర్‌లో 117 ఎకరాల భూమిని సేకరించామని, దీని కోసం రూ. 270 కోట్ల పెట్టుబడులు అవసరమని కేటీఆర్ తెలిపారు.

గతంలో రాష్ట్రంలో తొమ్మిది మినీ లెదర్ పార్కులు ఏర్పాటు చేసారని, అయితే అవి ఆశించిన స్థాయిలో రాణించడంలేదని వెల్లడించారు. ఈ తొమ్మిది మినీ లెదర్ ‌పార్కులను కొత్తగా నిర్మించే మెగా లెదర్ పార్కుకు అనుసంధానం చేస్తామని చెప్పారు. మెగా లెదర్ పార్కు ఏర్పాటుతో సుమారు 20 వేల మందికి ఉపాధి దొరుకుతుందని వివరించారు. లెదర్ పార్కులో ఉద్యోగులుగా స్థానికులకే ప్రాధాన్యం ఇస్తామని ఆయన స్పష్టం చేసారు.