Ganta Srinivasa Rao: ఆరోపణలు నిరూపిస్తే రాజకీయ సన్యాసం.. జగన్‌కు గంటా సవాల్

వైసీపీ అధ్యక్షుడు వైఎస్ జగన్మోహన్ రెడ్డి ప్రజా సంకల్ప యాత్ర ప్రస్తుతం విశాఖ జిల్లాల్లో కొనసాగుతోన్న విషయం తెలిసిందే. పాదయాత్రలో భాగంగా భీమిలి నియోజకవర్గంలో పర్యటించిన వైఎస్ జగన్, స్థానిక ఎమ్మెల్యే, మంత్రి గంటా శ్రీనివాసరావుపై విమర్శలు గుప్పించారు. ప్రభుత్వ భూములను తాకట్టుపెట్టి మంత్రి గంటా బ్యాంకుల నుంచి రుణాలు పొందారని జగన్ ఆరోపించారు. జగన్ ఆరోపణలపై స్పందించిన మంత్రి గంటా శ్రీనివాసరావు.. వైసీపీ అధినేత చేస్తున్న ఆరోపణలపై తాను చర్చకు సిద్ధమని ప్రకటించారు. ఇందుకోసం సమయం, స్థలం ఆయనే నిర్ణయించాలని, ఆరోపణల్లో ఒక్కటి నిరూపించినా మంత్రి పదవికి రాజీనామా చేసి, రాజకీయ సన్యాసం తీసుకుంటానని సవాల్ విసిరారు. తనపై ఆరోపణలు నిరూపించలేకపోతే జగన్ ఏ నిర్ణయం తీసుకుంటారో చెప్పాలని డిమాండ్ చేశారు.

ఉండవల్లి ప్రజావేదిక వద్ద సోమవారం ఆయన మీడియాతో మాట్లాడుతూ.. వస్త్రం కాల్చి ఎదుటివారిపై విసరడం తండ్రీ కొడుకులకు ముందు నుంచి అలవాటేనని ధ్వజమెత్తారు. జగన్‌ తన పాదయాత్రలో మతిభ్రమించి మాట్లాడుతున్నారని దుయ్యబట్టారు. గతంలో సీఎం చంద్రబాబు, మరెందరో పాదయాత్రలు చేశారని.. జగన్‌ చేస్తున్న యాత్ర మాత్రం వీటన్నింటికీ భిన్నంగా ఉందని విమర్శించారు. ప్రతి గురువారం యాత్రను నిలిపివేసి శుక్రవారం కోర్టుకు వెళ్లే జగన్, అవినీతి గురించి మాట్లాడటమంటే దయ్యాలు వేదాలు వల్లించినట్టే ఉందని ఎద్దేవా చేశారు.

పాఠశాలలో విద్యార్థులకు క్విజ్‌ పోటీలు నిర్వహిస్తే రాష్ట్రం, దేశంలో అత్యంత అవినీతిపరుడు ఎవరంటే జగన్‌ అని ఠక్కున సమాధానం చెబుతారని ఆరోపించారు. వైసీపీ మునిగిపోతున్న నావలాంటిదని, టీడీపీలో అయితే భవిష్యత్తు బాగుంటుందనే ఉద్దేశంతోనే ఆ పార్టీ ఎమ్మెల్యేలు టీడీపీలో చేరుతున్నారని, మరికొంతమంది అదే బాటలో ఉన్నారని గంటా శ్రీనివాసరావు పేర్కొన్నారు.