కేటీఆర్‌కు మ‌రో 'అంత‌ర్జాతీయ' ఆహ్వానం..!

తన పనితనంతో విశేష గుర్తింపు సొంతం చేసుకుంటున్న తెలంగాణ మంత్రి కేటీఆర్‌కు మరో అరుదైన గౌరవం దక్కింది. ఈ మేరకు... రష్యాలోని సెయింట్ పీటర్స్‌బర్గ్‌ లో జరగనున్న 'ఇంటర్నేషనల్ ఎకనామిక్ ఫోరమ్‌' సదస్సులో పాల్గొనాలని ఆయనకు ఆహ్వానం అందింది. మే 24న ప్రారంభమై మూడురోజులపాటు జరిగే ఈ సమావేశంలో 'అంతర్జాతీయ అర్థిక వ్యవస్థ' గురించి చర్చించనున్నారు.

వివిధ దేశాలకు చెందిన వాణిజ్య వేత్తలు, పలు దేశాల ప్రభుత్వాల ప్రతినిధులు సమావేశంలో పాల్గొననున్నారు. ఈ సమావేశంలో... తెలంగాణ రాష్ట్ర ప్రభుత్వ వాణిజ్య ప్రాధాన్యతలు, పెట్టుబడుల అవకాశాలు, ప్రభుత్వ విధానాలను వివరించాలని కేటీఆర్‌ను నిర్వాహకులు కోరారు. ఇంటర్నేషనల్ ఎకనామిక్ ఫోరమ్‌ నుంచి తనకు ఆహ్వానం రావడం పట్ల మంత్రి కేటీఆర్ హర్షం వ్యక్తం చేశారు.