హైదరాబాద్‌లో ఐటీ ఘనత చంద్రబాబుదే: కేటీఆర్

తెలంగాణ ఐటీ మంత్రి కేటీఆర్ ఏపీ సీఎం చంద్రబాబుపై ప్రశంసలు వర్షం కురిపించారు. ప్రపంచ ఐటీ రంగంలో హైదరాబాద్‌కు స్థానం కల్పించిన ఘనత చంద్రబాబుదేనని కొనియాడారు. భాగ్యనగరానికి ఐటీ పరిశ్రమలు రావడంలో ఆయన కీలక పాత్ర పోషించారని కేటీఆర్ వ్యాఖ్యానించారు. హైటెక్స్‌లో జరిగిన టెక్‌ మహీంద్రా ఎంఐ-18 వార్షిక ఆవిష్కరణ దినోత్సవంలో ముఖ్య అతిథిగా పాల్గొన్న కేటీఆర్‌ పలువురు అడిగిన ప్రశ్నలకు సమాధానం ఇస్తూ పై విధంగా స్పందించారు. ఈ కార్యక్రమంలో టెక్‌ మహీంద్రా సీఈఓ సీపీ గుర్నాని అడిగిన ప్రశ్నకు కేటీఆర్‌ ఆసక్తికర సమాధానం ఇచ్చారు. ప్రపంచంలో ఐటీ హబ్‌గా హైదరాబాద్‌ను నిలపడంలో చంద్రబాబు కృషి అమోఘమని, మైక్రోసాఫ్ట్‌ లాంటి ప్రఖ్యాత సంస్థలు హైదరాబాద్‌కు రావడంలో నా కృషి ఏమీ లేదు. ఆ క్రెడిట్‌ అంతా ఆయనకే దక్కుతుందని కేటీఆర్‌ పేర్కొన్నారు.

ఈ సందర్భంగా పలువురు అడిగిన ప్రశ్నలకు సమాధానమిస్తూ.. భవిష్యత్తులో హైదరాబాద్‌ నగర అభివృద్ధి ప్రణాళికలు, ఐటీ మౌలిక సదుపాయాల కల్పనపై వివరించారు. బెంగళూరు, గురుగ్రామ్‌తో పోలిస్తే హైదరాబాద్‌లో మౌలిక సదుపాయాలు అద్భుతంగా ఉన్నాయని అన్నారు. 17 ఏళ్లలో మైక్రోసాఫ్ట్‌, గూగుల్‌, యాపిల్‌ లాంటి ప్రపంచ దిగ్గజ సంస్థలు హైదరాబాద్‌కు వచ్చాయన్నారు. ఆంధ్రప్రదేశ్‌ రాజధాని అమరావతి భవిష్యత్తులో అభివృద్ధి చెందుతుందని, హైదరాబాద్‌ నగరం ఒక్కరోజులో అభివృద్ధి చెందలేదని.. ఈ నగరానికి 450 ఏళ్ల సుదీర్ఘ చరిత్ర ఉందన్నారు.