ఆయన దుమ్మెత్తి పోస్తే నేను దులుపుకోవాలా: లోకేష్

పవన్ కళ్యాణ్ ఆరోపణలపై మంత్రి నారా లోకేష్ స్పందించారు. మీడియాతో చిట్‌చాట్‌గా మాట్లాడిన ఆయన... నిరాధార ఆరోపణలపై స్పందించాల్సిన అవసరం లేదన్నారు. శేఖర్‌రెడ్డితో తనకు సంబంధాలున్నాయంటూ ఆరోపించారని... తర్వాత మాట ఎందుకు మార్చారని ప్రశ్నించారట. ఆధారాలుంటే ఒక్కరోజులోనే మాట ఎలా మారుస్తారని... తన తాతకు చెడ్డపేరు తెస్తున్నాననే ఆరోపణలు బాధించాయన్నారట. ఎప్పటికప్పుడు ఆస్తుల్ని ప్రకటించి నిబద్ధత చాటుకుంటున్నామని... అహర్నిశలు కష్టపడుతున్న సీఎంకు పవన్ రేటింగ్ ఇవ్వడమేంటన్నారట. అయినా ఆయన దుమ్మెత్తి పోస్తే తాను దులుపుకోవాలని అని ప్రశ్నించారట.

ఏపీ ప్రజలు తెలివైన వారని... ఎవరేంటో వాళ్లకు తెలుసన్నారట లోకేష్. పవన్ సర్టిఫికెట్ తమకు అవసరం లేదని వ్యాఖ్యానించారట. దిగజారుడు రాజకీయాలు విచారకరమని... తనతో ప్లానింగ్ కమిషన్ సభ్యుడు పెద్ది రామారావు ఫోటో దిగితే... అది శేఖర్ రెడ్డి అంటూ ప్రచారం చేయడం దారుణమన్నారట. పవన్ నాలుగేళ్లు తనతో స్నేహం చేశారని... తాను అవినీతికి పాల్పడి ఉంటే ఆ విషయం తనకే నేరుగా ఫోన్ చేసి అడగొచ్చు కదా అని వ్యాఖ్యానించారట.