వివాహితతో మైనర్ బాలుడి అక్రమ సంబంధం.. ఆత్మహత్య

మైనర్ బాలుడి(17)తో ఓ వివాహిత అక్రమ సంబంధం పెట్టుకున్న ఘటన ఓ నిండు ప్రాణం పోవడానికి కారణమైంది. తెలంగాణలోని కుమ్రం భీం జిల్లాలో ఈ విషాదం చోటుచేసుకుంది. జైనూరు మండలం ఫరా గ్రామానికి చెందిన మైనర్ బాలుడు.. అదే గ్రామానికి చెందిన ఓ వివాహితతో అక్రమ సంబంధం కొనసాగిస్తున్నాడు. వీరిద్దరూ రెండు రోజుల కిందట గ్రామం నుంచి వెళ్లిపోయారు. ఈ ఘటన స్థానికంగా సంచలనం సృష్టించింది.

ఈ ఉదంతంతో నివ్వెరపోయిన బాలుడి కుటుంబీకులు వారి ఆచూకీ తెలుసుకొని బుధవారం (మే 16) ఇంటికి తీసుకొచ్చారు. బాలుడి తల్లిదండ్రులు అతణ్ని మందలించారు. బంధువులు కూడా వచ్చి అతణ్ని చీవాట్లు పెట్టారు. దీంతో బాలుడు మనస్తాపం చెందాడు. గురువారం ఇంట్లో ఎవరూ లేని సమయంలో పురుగుల మందు తాగి ఆత్మహత్యాయత్నానికి పాల్పడ్డాడు.

అపస్మారక స్థితిలో ఉన్న బాలుణ్ని గమనించిన కుటుంబ సభ్యులు 108కు సమాచారం ఇచ్చి ఉట్నూరు ఆస్పత్రికి తరలించారు. అక్కడ చికిత్స పొందుతూ పరిస్థితి విషమించి బాలుడు మృతి చెందాదు. కేసు నమోదు చేసుకున్న పోలీసులు దర్యాప్తు చేస్తున్నారు.