అనంతపురంలో చిన్నారి పెళ్లికూతురు

కన్నతల్లే కూతురు గొంతుకోయడానికి సిద్ధపడింది. తాను వివాహేతర సంబందం పెట్టుకున్న వ్యక్తికే తన మైనర్ కూతురిని ఇచ్చి పెళ్లి చేయడానికి సిద్ధపడింది. దీంతో ఆ బాలిక వారికి దొరక్కుండా పారిపోయింది. అనంతపురంలో గోని మేకలపల్లి గ్రామానికి చెందిన బాలిక (13) స్థానిక ప్రభుత్వ పాఠశాలలో చదువుకుంటోంది. ఆమె తల్లి పక్క గ్రామానికి చెందిన రామాంజినేయులు అనే వ్యక్తితో కొన్ని రోజులుగా వివాహేతర సంబంధాన్ని కొనసాగిస్తోంది. తల్లి కోసం ఇంటికి వచ్చే ఆ దుర్మార్గుడు బాలికపై కూడా కన్నేశాడు. ఆమెను పెళ్లి చేసుకుంటానని తల్లిని నమ్మించాడు. అందుకు ఆ కసాయితల్లి ఒప్పుకుంది. పెళ్లి చేయడానికి నిశ్చయించింది. బాలిక అందుకు ఒప్పుకోకపోవడంతో ఆమె ఓ గదిలో వేసి బంధించేందుకు ప్రయత్నించారు.

బాలిక ఈలోపు అదను చూసి ఇంట్లోంచి పరుగులు తీసింది. పొలాల్లోంచి పరిగెట్టుకుంటూ తన పాఠశాల ఉన్న ప్రాంతానికి పరిగెట్టింది. ఆమెను పట్టుకునేందుకు తల్లి, రామాంజినేయులు, బాలిక అన్న కూడా పరిగెట్టారు. బాలిక తన కష్టాన్ని కాలనీలోని స్థానికులకు చెప్పింది. వారు వెంటనే ఆమెకు ఆశ్రయం కల్పించి, విషయాన్ని పోలీసులకు తెలియజేశారు. వెంటనే ఎస్ఐ బాలిక వద్దకు చేరుకుని ఆమెను స్టేషన్ కు తీసుకెళ్లారు. ఆమె నుంచి ఫిర్యాదును స్వీకరించి అనంతరం అనంతపురంలో ఉన్న సంరక్షణా కేంద్రానికి తరలించారు. తల్లిపై కేసు నమోదు చేశారు పోలీసులు.