కరవు ప్రాంతాలకు వరం లాంటి పథకం..

తెలంగాణ ప్రభుత్వం ప్రతిష్టాత్మకంగా తలపెట్టిన ‘మిషన్ కాకతీయ’ పథకాన్ని కేంద్ర ఇంజినీర్ల బృందం ప్రశంసించింది. పథకం అమలు తీరును స్వయంగా పరిశీలించిన ఇంజినీర్లు ఆనందం వ్యక్తం చేశారు. మిషన్ కాకతీయ తరహాలో కేంద్ర ప్రభుత్వం ఓ పథకం రూపకల్పనకు యోచిస్తున్న విషయం తెలిసిందే. ఈ నేపథ్యంలో కేంద్ర జల వనరుల శాఖా మంత్రి ఉమాభారతి సూచన మేరకు కేంద్ర జల సంఘం ఆధ్వర్యంలో 30 మంది నీటి పారుదల ఇంజినీర్ల బృందం తెలంగాణలో పర్యటించింది. ఈ బృందంలో సీడబ్ల్యూసీ సీఈ సీకేఎల్ దాస్, కేఆర్‌ఎండీ చైర్మన్ ఎస్కే హల్దర్, కృష్ణా గోదావరి బేసిన్ ఆర్గనైజేషన్ సీఈ ఆర్కే గుప్తా తదితరులతోపాటు.. ఢిల్లీ, ఉత్తరప్రదేశ్, మహారాష్ట్ర, మధ్యప్రదేశ్, ఒడిశా రాష్ట్రాల నీటిపారుదల శాఖ సీఈలు, ఎస్‌ఈలు ఉన్నారు. బృందం సభ్యులు సోమవారం (మార్చి 3) మెదక్ జిల్లాలో పలు చెరువులను సందర్శించారు.

మిషన్ కాకతీయ కింద అభివృద్ధి చేసిన.. నర్సాపూర్‌లోని రాయరావు చెరువు, హత్నూర పెద్ద చెరువులను పరిశీలించారు. ఆ తర్వాత తూప్రాన్ పెద్ద చెరువులో.. పూడికతీత, బతుకమ్మ ఘాట్ల నిర్మాణం, కట్టు కాలువ, కట్ట బలోపేతం తదితర పనులను పరిశీలించారు. ఈ సందర్భంగా వీరికి మత్స్యకారులు చేపల వలలతో, మహిళలు బతుకమ్మలు, బోనాలతో.. డప్పు చప్పుళ్ల మధ్య ఘన స్వాగతం పలికారు.

హైదరాబాద్‌లోని మర్రి చెన్నారెడ్డి మానవ వనరుల కేంద్రంలో తెలంగాణ నీటి పారుదల అధికారులు.. కేంద్ర ఇంజనీర్ల బృందానికి పథకం అమలు తీరును ప్రొజెక్టర్ సాయంతో వివరించారు. ఈ సందర్భంగా సీకేఎల్ దాస్ మాట్లాడుతూ.. సీఎం కేసీఆర్ దూరదృష్టితో మిషన్ కాకతీయను చేపట్టారని, ఇది ఇతర రాష్ట్రాలకు ఆదర్శంగా నిలిచిందని పేర్కొన్నారు. ఇందులో ప్రజలను భాగస్వామ్యం చేస్తున్న తీరు బాగుందని కితాబిచ్చారు.

కరవు ప్రాంతాలకు ఇది వరం లాంటిదని.. సామాజిక, ఆర్థిక వ్యవస్థను ఈ పథకం ప్రభావితం చేస్తుందని పలువురు ఇంజినీర్లు అన్నారు. మహారాష్ట్రలోని మరాఠ్వాడా, ఒడిశాలోని కలహండి, బుందేల్‌ఖండ్ లాంటి కరవు పీడిత ప్రాంతాల్లో ఈ పథకం అమలు చేయాలని ప్రాథమికంగా అవగాహనకు వచ్చినట్లు వారు తెలిపారు.