నిరసన: దున్నపోతుపై బాలకృష్ణ అని రాసి...

హీరో బాలకృష్ణ అనంతపురంలోని హిందూపురం నియోజక వర్గ ఎమ్మెల్యే కూడా. ఆ నియోజకవర్గంలో తాగునీటి ఎద్దడి అధికంగా ఉంది. ఎన్నికల సమయంలో తాగునీటి సమస్య తీరుస్తానని బాలయ్య హామీ ఇచ్చారని, ఇంతవరకు ఎలాంటి చర్యలు తీసుకోలేదంటూ...అనేక మంది మహిళలు ఖాళీ బిందెలతో నిరసన తెలిపారు. ఆయన ఆరునెలలుగా తమ నియోజకవర్గానికి కూడా రాలేదని మండిపడ్డారు. కొంతదూరం ర్యాలీ నిర్వహించారు. ఆ ర్యాలీలో ఓ దున్నపోతుపై ఎమ్మెల్యే బాలకృష్ణ అని రాసి ఊరేగించారు. ఆ ఊరేగింపుకు వైసీపీ నేతలు ప్రాతినిధ్యం వహించారు. దీంతో టీడీపీ - వైసీపీ మధ్య గొడవలు అవుతాయన్న భయంతో పోలీసులు ముందస్తుగానే వారిని అడ్డుకున్నారు. గొడవలకు దారి తీసే విధంగా ప్రదర్శనలు నిర్వహించవద్దని చెప్పారు. అయినా వైసీపీ నేతలు వెనక్కి తగ్గకపోవడంతో... పదిహేను మంది కార్యకర్తలను అరెస్టు చేశారు. దీనిపై వైసీపీ నేతలు ఆగ్రహం వ్యక్తం చేశారు. పోలీసులు టీడీపీ తొత్తుల్లా ప్రవర్తిస్తున్నారని విమర్శించారు. కాసేపు రోడ్డు మీదే బైఠాయించి నిరసన తెలిపారు. ఖాళీ బిందెలతో వచ్చిన మహిళలంతా వెనుదిరిగారు. అయితే బాలయ్య పేరును దున్నపోతుపై రాయడాన్ని అనంతపురం టీడీపీ నేతలు, కార్యకర్తలు తీవ్రంగా ఖండిస్తున్నారు.