చంద్రబాబూ.. నీది నోరా? తాటి మట్టా?

నంద్యాల ఉప ఎన్నికల ప్రచారం చివరి దశకు చేరుకోవడంతో అక్కడి రాజకీయం రసవత్తరంగా మారుతోంది. అధికార, ప్రతిపక్ష నేతల మధ్య మాటల తూటాలు పేలుతున్నాయి. ఈ సందర్భంగా శనివారం నంద్యాల ఉప ఎన్నిక ప్రచారంలో పాల్గొన్న రోజా.. సీఎం చంద్రబాబు, మంత్రి అఖిల ప్రియలపై తీవ్ర వ్యాఖ్యలు చేశారు. జగన్‌ను అన్న ప్రాసన రోజున గన్ పట్టుకున్నారన్న చంద్రబాబు వ్యాఖ్యలపై మండి పడుతూ చంద్రబాబు నీది నోరా? లేక తాటి మట్టా అంటూ తీవ్రస్థాయిలో విరుచుకుపడ్డారు.

జగన్‌ను విమర్శించే ముందు చంద్రబాబు ఆత్మవిమర్శ చేసుకోవాలని ఎన్నికల్లో ఇచ్చిన 600 హామీలు ఏమయ్యాయని.. వాటిని నెరవేర్చకుండా మళ్లీ సిగ్గులేకుండా హామీలు ఇస్తున్నారన్నారు. శవాలపై రాజకీయాలు చేసేది చంద్రబాబే అని జగన్‌కు చంద్రబాబులా వెన్నుపోటు రాజకీయాలు తెలయదంటూ ఒకవేళ జగన్.. చంద్రబాబులా ఆలోచించి ఉంటే ఇప్పటికే సీఎం అయ్యి ఉండేవారన్నారు. తన పార్టీ ఎమ్మెల్యేలతో రాజీనామా చేయించి తిరిగి గెలిచిన చరిత్ర జగన్‌ది, అదీ రాయలసీమ పౌరుషం అంటే.. చంద్రబాబు ఉన్నాడు సిగ్గు, శరం లేకుండా రాజకీయం చేస్తున్నాడంటూ మండిపడ్డారు.

నంద్యాలలో భూమా నాగిరెడ్డిని హింసించి అతనిపై రౌడీ షీట్‌లు తెరిపించి ఎస్సీ, ఎస్టీ కేసులు పెట్టారని.. చివరికి మంత్రి పదవి ఆశ చూపి పార్టీలో చేర్చుకుని ఇవ్వకుండా మనోవేదనకు గురిచేసి ఆయన గుండె పోటుతో చనిపోవడానికి చంద్రబాబే కారణం అంటూ ఆరోపణలు గుప్పించారు. ఆయన చనిపోయిన తరువాత ఉపఎన్నికలు వస్తే.. ఆయన చావును రాజకీయం చేస్తున్నది ఎవరో చెప్పాలన్నారు.

ఇవేమీ పట్టనట్లు అఖిల ప్రియ కేవలం మంత్రి పదవికోసం ఆశపడి తన తల్లిదండ్రులు చనిపోయారని సిగ్గులేకుండా ఓటు అడగుతుందని మంత్రి అఖిల ప్రియపై సంచలన ఆరోపణలు చేశారు. 2019 ఎన్నికల్లో జగన్ సీఎం కావడం ఖాయం అని ఈ ఉపఎన్నికల్లో నంద్యాల గడ్డ వైఎస్ఆర్ అడ్డా అనేవిధంగా ఈ ఉప ఎన్నికల్లో శిల్పాను గెలిపించాలన్నారు. చంద్రబాబు రాయలసీమ ద్రోహి అని, నంద్యాల ఎన్నికల్లో టీడీపీని ఓడించి వారికి తగిన బుద్ది చెప్పాలని ప్రజలకు పిలుపునిచ్చారు రోజా.