బ్లాక్ ఫిల్మ్ గురించి తెలియదు సార్: ఎమ్మెల్యే

మూడేళ్ల క్రితం కార్లు, ఇతర వాహనాల అద్దాలకు పూర్తిగా నల్లరంగు వాడకాన్ని సుప్రీంకోర్టు నిషేదించినా రంగారెడ్డి జిల్లా చేవేళ్ల ఎమ్మెల్యే కాలే యాదయ్య మాత్రం తన కారుకు బ్లాక్ ఫిల్మ్ ను యథేచ్ఛగా వినిగించుకుంటున్నారు. అదేంటనీ పోలీసులు ప్రశ్నిస్తే... ‘అయ్యో, ఆ విషయం నాకు తెలియదు సార్..’ అంటూ సమాధానమిచ్చారు.

గురువారం ఉదయం ఔటర్ రింగ్ రోడ్డు మీదుగా వెళ్తున్న ఎమ్మెల్యే కారును ట్రాఫిక్ పోలీసులు నానక్ రామ్ గూడ వద్ద ఆపారు. కారు అద్దాలకు బ్లాక్ ఫిల్మ్ వాడరాదని చెప్పారు. అయితే తాను ఎమ్మెల్యేనని యాదయ్య కాసేపు పోలీసులపై ఆగ్రహం వ్యక్తం చేశారు.

చేసేది లేక పోలీసులు రూల్స్ అండ్ రెగ్యులేషన్స్ విడమరచి చెప్పడంతో యాదయ్య కాస్తా తగ్గారు. ‘ఆ విషయం నాకు తెలియదు సార్. ఎండ నుంచి కాపాడుకోవడానికి చల్లగా ఉందని వాడుతున్నా’ అన్నారు. పోలీసులు విధించిన రూ.500 జరిమానా కట్టి అక్కడి నుంచి వెళ్లిపోయారు.