రైతు సమస్యల పరిష్కారానికి ప్రత్యేక 'యాప్'..!

దేశానికి వెన్నెముక లాంటి రైతన్న నేడు ఎన్నో ఇబ్బందులు పడుతున్నాడు. పొలంలో విత్తనాలు నాటినప్పటి నుంచి... పంటకోత వరకు ఆపసోపాలు పడుతున్నాడు. ఈ సమయంలో పంటకు సంబంధించి ఎలాంటి ఎరువులు వాడాలి, ఎంత మోతాదులో వాడాలి, పంట రక్షణకు ఎలాంటి చర్యలు తీసుకోవాలి లాంటి ఎన్నో అనుమానాలు, సందేహాలు ఉక్కిరిబిక్కిరి చేస్తుంటాయి. వాటిని నివృత్తి చేసుకోవాలంటే ఎక్కడో ఉండే వ్యవసాయ అధికారి దగ్గరికి వెళ్లాల్సి వచ్చేది. ఇకపై ఇలాంటి సమస్యలకు చెక్‌పెడుతూ... మొబైల్ ఫోన్ ద్వారానే రైతు సమస్యల పరిష్కారానికి మంచి వేదిక ఏర్పాటైంది. 'కృషి గ్యాన్ - తెలుగు (Krishi Gyan- Telugu)' పేరిట ఓ మొబైల్ యాప్‌ను రూపొందించారు. 'వ్యవసాయ జ్ఞానం' అనే ప్ర‌ధాన శీర్షిక‌తో ఈ యాప్‌ను అందుబాటులోకి తెచ్చారు.
ఇండియ‌న్ సొసైటీ ఆఫ్ అగ్రిబిజినెస్ ప్రొఫెష‌న‌ల్స్ (ఐఎస్ఏపీ) సంస్థ ఈ యాప్‌ను రూపొందించింది. ఈ యాప్‌లోకి వెళ్లడానికి రైతులు వివరాలను నమోదుచేయాల్సి ఉంటుంది. రిజిస్ట్రేషన్ ప్రక్రియ పూర్తయ్యాక...యాప్‌లో నిపుణులను అడగండి, విజ్ఞాన కేంద్రం అని రెండు విభాగాలుంటాయి. వాటిలో ‘నిపుణులను అడగండి’ విభాగం ద్వారా రైతులు తమ సందేహాలను అడిగి సమాధానాలు పొందొచ్చు. ‘విజ్ఞాన కేంద్రం’ విభాగంలో వ్యవసాయ రంగానికి సంబంధించిన వివిధ విభాగాల్లో సలహాలు, వాటిని వివరించే వీడియోలు అందుబాటులో ఉన్నాయి. వాతావరణం విషయంలోనూ ఈ ఆప్‌ ద్వారా రైతులు పలు సలహాలు పొందే వీలుంది.