తెలంగాణలో ఇవాళ, రేపు భారీ వర్షాలు

రెండు రోజులుగా తెలంగాణలో భారీగా కురుస్తున్న వర్షాలు.. మరో రెండురోజుల పాటు అదే స్థాయిలో పడనున్నాయి. ఇవాళ, రేపు రాష్ట్రంలో భారీ నుంచి అతిభారీ వర్షాలు కురుస్తాయని వాతావరణ శాఖ తెలిపింది. బంగాళఖాతంలోని వాయుగుండం బుధవారం తెల్లవారుజామున ఒడిషా వద్ద తీరం దాటింది. అటు నుంచి పశ్చిమ వాయవ్య ప్రయాణిస్తూ అల్పపీడనంగా మారి చత్తీస్ గఢ్, ఒడిషా పరిసరాల్లో కేంద్రీకృతమైంది. దీనిపై ఉపరితల ఆవర్తనం ఉంది.

వాయుగుండం కారణంగా నైరుతి రుతుపవనాలు చురుకుగా ఉండటంతో పలుచోట్ల విస్తారంగా వర్షాలు పడ్డాయి. జయశంకర్ భూపాలపల్లి, ఆదిలాబాద్, కుమ్రం భీం, నిర్మల్, జగిత్యాల, కొత్తగూడెం, నిజామాబాద్, కామారెడ్డి, మెదక్, సిద్ధిపేట, కరీంనగర్, రాజన్న సిరిసిల్ల, వరంగల, మహబాబాద్ వంటి జిల్లాల్లో గురు, శుక్రవారాల్లో భారీ నుంచి అతిభారీ వర్షాలు కురిసే అవకాశం ఉందని వాతావరణ శాఖ ఒక ప్రకటనలో తెలిపింది.

మంగళవారం, బుధవారం కురిసిన భారీ వర్షాలకు హైదరాబాద్ సహా పలు నగరాలు జలమయమయ్యాయి. పలుచోట్ల చెట్లు కూలాయి. రహదారులు జలమయమవడంతో ట్రాఫిక్ కు తీవ్ర అంతరాయం కలిగింది.