విషాదం: నీటి గుంతలోకి చిన్నారులు.. కాపాడే క్రమంలో తల్లి కూడా

బట్టలు ఉతకడానికి వెళ్తున్న తల్లితో మేమూ వస్తామంటూ వెంట వెళ్లారు ఇద్దరు చిన్నారులు. అక్కడ సరదాగా ఆడుకుంటూ ప్రమాదవశాత్తు నీటిగుంతలో పడి మరణించారు. వారిని కాపాడే ప్రయత్నంలో తల్లి కూడా నీటి గుంతలో మునిగిపోయి మరణించింది. కృష్ణా జిల్లాలోని కంచకచర్లలో ఆదివారం (నవంబర్ 25) ఉదయం ఈ విషాదం చోటుచేసుకుంది. పోలీసులు, స్థానికులు తెలిపిన వివరాల ప్రకారం..

కంచికచర్ల మండలం పరిటాల గ్రామానికి చెందిన పరమేశ్వరి (45) ఆదివారం (నవంబర్ 25) ఉదయం దుస్తులు ఉతకడానికి గ్రామ సమీపంలోని ఓ క్వారీ గుంత వద్దకు వెళ్లింది. పరమేశ్వరి వెంట ఆమె కూతుళ్లు దుర్గ (8), మీనా(4) కూడా వెళ్లారు. క్వారీ సమీపంలోని నీటిగుంత వద్ద ఆమె దుస్తులు ఉతుకుతుండగా.. చిన్నారులు ఆడుకుంటూ ప్రమాదవశాత్తు నీటిగుంతలో పడిపోయారు.

పిల్లలు నీటిగుంతలో పడిపోయిన విషయాన్ని గమనించిన పరమేశ్వరి హుటాహుటిన పరుగెత్తింది. వాళ్లను కాపాడే ప్రయత్నంలో ఆమె కూడా నీటిగుంతలో పడి పోయింది. విషాదకర రీతిలో ముగ్గురూ ప్రాణాలు విడిచారు.

స్థానికుల ద్వారా సమాచారం అందుకున్న పోలీసులు ఘటనాస్థలికి చేరుకొని పరిశీలించారు. నందిగామ గ్రామీణ సీఐ సతీష్‌, కంచకచర్ల ఎస్సై చంద్రశేఖర్ ప్రమాద స్థలికి చేరుకొని పరిశీలించారు. కేసు నమోదు చేసి దర్యాప్తు చేస్తున్నట్లు తెలిపారు. తల్లి, ఇద్దరు ఆడపిల్లలు.. ఒకేసారి ముగ్గురు మృత్యువాతపడటంతో పరిటాల గ్రామంలో విషాద ఛాయలు అలుముకున్నాయి.