జస్లిన్ కౌర్ 'డాటర్ ఆఫ్ హైదరాబాద్'.. నగర సీపీ భావోద్వేగ సందేశం

శాంతిభద్రతలే కాదు.. సామాజిక అంశాలపై కూడా ప్రజలకు అవగాహన కల్పిస్తున్నారు హైదరాబాద్ పోలీసులు. ఇబ్బంది ఏదైనా తామున్నామంటూ ధైర్యం నింపే ప్రయత్నం చేస్తున్నారు. తాజాగా నీట్‌లో ర్యాంకు రాలేదన్న బాధతో ఆత్మహత్య చేసుకున్న జస్లిన్ కౌర్ ఎపిసోడ్‌పై కమిషనర్ అంజనీ కుమార్ స్పందించారు. భావోద్వేగంతో తన సందేశాన్ని తెలియజేశారు. డాటర్ ఆఫ్ హైదరాబాద్ అంటూ ఆమె మరణంపై తన ఆవేదనను వ్యక్తం చేశారు. ఓ ఆడియో ద్వారా తన బాధను ప్రజల ముందు ఉంచారు.

జస్లిన్ కౌర్ ఆత్మహత్య ఎంతగానో కలిచివేసింది. ఇలాంటి ఘటనలు జరగడం దురదృష్టకరం. 'డాటర్ ఆఫ్ హైదరాబాద్ మన మధ్య లేకుండా వెళ్లిపోయింది.
ఈ ఘటన మమ్మల్ని ఎంతో బాధించింది. ఇవి మళ్లీ జరగడకుండా అవగాహన కల్పించాల్సిన అవసరం ఉంది. పోలీసు సిబ్బంది.. వారి, వారి పరిధిలోని విద్యార్థుల్లో భరోసా నింపాలి. యువతీ యువకులకు ఒక్కటే చెప్పదలచుకున్నా.. ప్రతికూల సమయాలు, సవాళ్లు ఎదురైనప్పుడు మనం సాధించిన విజయాలను గుర్తు కూడా చేసుకోవాలి. ప్రతి రాత్రి వెనుక ఓ సూర్యోదయం ఉంటుంది. మిమ్మల్ని మీరు నమ్మండి.. దేవుడిపై పై కూడా విశ్వాసం ఉంచండి' అంటూ ఆడియో ద్వారా తన సందేశాన్ని తెలియజేశారు.

జస్లిన్ కౌర్ కుటుంబానికి కూడా సీపీ తన సానుభూతిని తెలిపారు. తన విలువైన జీవితాన్ని చిన్న వయసులోనే కోల్పోవడం నా గుండెను కదిలించింది. ఈ విషాదాన్ని తట్టుకునే శక్తిని ఆమె కుటుంబానికి ఇవ్వాలని దేవుడిని ప్రార్థిస్తున్నా. ఈ అనారోగ్యకరమైన పోటీ చిన్ని హృదయాలపై ఎంతటి ప్రభావం చూపుతోందో.. ఎంత ఒత్తిడిని పెంచుతుందో అందరూ ఆలోచించాల్సిన సమయం వచ్చింది. జీవితం కేవలం చదువుల కోసం కాదనే విషయాన్ని అర్థమయ్యేలా వివరించాలి. భవనాల యజమానులు.. తమ టెర్రాస్‌ తలుపులకు తాళం వేయాలని కోరుతున్నా. ఈ కోణంలో అవగాహన కల్పించాల్సింగా అధికారులు, సిబ్బందికి సూచించారు.