టీ.కాంగ్రెస్ నేత కుమారుడిపై కాల్పులు

తెలంగాణ కాంగ్రెస్ నేత, మాజీ మంత్రి ముఖేష్ గౌడ్ కుమారుడు విక్రమ్ గౌడ్ పై గుర్తు తెలియని వ్యక్తులు కాల్పులు జరిపారు. హైదరాబాద్ లోని ఫిల్మ్ నగర్ రోడ్డు నంబర్ 86లోని ముఖేష్ గౌడ్ నివాసం వద్ద ఈ సంఘటన చోటు చేసుకుంది. శుక్రవారం తెల్లవారుఝామున విక్రమ్ గౌడ్ పై ఈ దాడి జరిగినట్టుగా తెలుస్తోంది. తీవ్రంగా గాయపడిన విక్రమ్ గౌడ్ జూబ్లీహిల్స్ అపోలోలో చికిత్స పొందుతున్నారు.

ప్రస్తుతం ఆయన పరిస్థితి మెరుగ్గా ఉందని, ప్రాణాపాయమేమీ లేదని బంజారాహిల్స్ పోలీసులు తెలిపారు. అయితే ఈ దాడి ఎందుకు జరిగింది, ఎవరు చేశారనే అంశంపై ఇంకా స్పష్టత లేదని పోలీసులు తెలిపారు. దీనిపై విచారణ చేపట్టామని ప్రకటించారు.

విక్రమ్ పై రెండు రౌండ్ల కాల్పులు జరిగినట్టుగా తెలుస్తోంది. పొట్టలోకి ఒక బుల్లెట్, భుజంలోకి ఒక బుల్లెట్ దిగిందని సమాచారం. తెల్లవారుఝామున మూడున్నరకు ఈ సంఘటన చోటు చేసుకున్నట్టుగా తెలుస్తోంది.