నిరుద్యోగ భృతి: రిజిస్ట్రేషన్ అనధికారిక ప్రారంభం.. 52 వేల దరఖాస్తులు

గత ఎన్నికల్లో హామీ మేరకు ఆంధ్రప్రదేశ్ ప్రభుత్వం నిరుద్యోగ యువతకు ఆర్థికంగా చేయూతనిచ్చేందుకు ప్రవేశపెడుతున్న ‘ముఖ్యమంత్రి యువనేస్తం’ పథకం వచ్చే నెల నుంచి ప్రారంభించనున్న విషయం తెలిసిందే. ఈ పథకం కింద లబ్ధిదారుల నమోదు ప్రక్రియ ఇప్పటికే అనధికారికంగా ప్రారంభమైంది. బుధవారం రాత్రి 9 గంటల సమయానికి 52,050 మంది తమ పేర్లను నమోదు చేసుకున్నారు. అయితే, నమోదు ప్రక్రియ అధికారికంగా శుక్రవారం ప్రారంభంకానుంది. ముఖ్యమంత్రి చంద్రబాబు నాయుడు దీనిని లాంఛనంగా ప్రారంభించనున్నారు. వెబ్‌సైట్‌ను పరిశీలనకు ఇప్పటికే అందుబాటులోకి తేవడంతో చాలామంది పేర్లు నమోదు చేసుకుంటున్నారు.

అలాగే నమోదు చేసుకున్నవారిలో 10,022 మంది ధ్రువపత్రాల పరిశీలన కూడా పూర్తి చేసినట్టుగా అందులో పేర్కొన్నారు. 3,135 మంది నుంచి వివిధ ఫిర్యాదులు రాగా, వాటిలో 150 పరిష్కరించినట్టు తెలియజేశారు. ఈ పథకానికి అర్హతలు, అవసరమైన ధ్రువీకరణ పత్రాల సమాచారాన్నీ ఇందులో పొందుపరిచారు. ముఖ్యమంత్రి యువనేస్తం పేరుతో ప్రభుత్వం యాప్‌నూ రూపొందించింది. ఈ పథకంపై మంగళవారం శాసనసమండలిలో ఏపీ ఐటీ, గ్రామీణాభివృద్ధి మంత్రి నారా లోకేశ్ ప్రజంటేషన్ ఇచ్చారు. సీఎంతోపాటు పలువురు ప్రజాప్రతినిధులు ఈ సందర్భంగా లోకేశ్‌ను అభినందించారు.