పాదంతో పెయింటింగ్... తెలుగమ్మాయి గిన్నిస్ రికార్డ్

తెలుగమ్మాయి జాహ్నవి మాగంటి ప్రపంచ రికార్డ్ నెలకొల్పింది. పాదాలతోనే అతిపెద్ద పెయింటింగ్ వేసిన ఆమె గిన్నిస్ బుక్ ఆఫ్ వరల్డ్ రికార్డ్స్‌లో స్థానం సంపాదించింది. జాహ్నవి 140 చదరపు మీటర్ల మేర పాదంతోనే పెయింటింగ్ వేసింది. బ్రిటన్లోని యూనివర్సిటీ ఆఫ్ వార్విక్‌లో జాహ్నవి విద్యను అభ్యసిస్తోంది. ఇప్పటి వరకూ 100 చ.మీ. పెయింటింగే వరల్డ్ రికార్డ్ కాగా.. దాన్ని 18 ఏళ్ల జాహ్నవి బద్దలుకొట్టింది. హైదరాబాద్ ల్యాంకో హిల్స్‌లో ఆమె ఈ ఫీట్ సాధించింది.

పెయిటింగ్ వేయడాన్ని ఎంతో ఇష్టపడే జాహ్నవి.. చక్కగా డ్యాన్స్ చేస్తుంది. మంచి కళాకారిణి అయిన ఆమె శాస్త్రీయ సంగీతాన్ని ఆలపించడంలో దిట్ట. క్రీడల్లోనూ ప్రావీణ్యం ఉన్న ఆమె జాతీయ స్థాయి బాస్కెట్‌బాల్ ప్లేయర్ కావడం విశేషం. అరుదైన విషయం ఏంటంటే.. తను డ్యాన్స్ చేస్తున్నప్పుడే పెయింటింగ్ వేయగలదు. అలా నృత్యం చేస్తూ నెమలి ఫించం, తామర పుష్పాలను ఆమె పాదంతోనే గీసింది.