15.60 లక్షలు పలికిన బాలాపూర్ లడ్డూ

వేలంపాటలో బాలాపూర్ లడ్డూ కొత్త చరిత్ర సృష్టించింది. ప్రతిష్టాత్మకమైన బాలాపూర్ గణనాథుని లడ్డూను ఈ ఏడాది రికార్డు స్థాయిలో 15 లక్షల 60 వేల రూపాయలు పలికింది. జూబ్లీహిల్స్‌ అయ్యప్ప సొసైటీకి చెందిన నాగం తిరుపతి రెడ్డి వేలంపాటలో గెలిచి ఈ లడ్డూను దక్కించుకున్నారు. వేలం ప్రక్రియ ప్రారంభించిన కొద్ది సమయంలోనే 10 లక్షల మార్క్ దాటిన లడ్డూకు తీవ్రమైన పోటీ ఏర్పడింది. భక్తుల పాలిట కొంగు బంగారంగా భావించే.. బాలాపూర్‌ గణేశుడి లడ్డూను దక్కించుకోడానికి 21 మంది పోటీపడ్డారు.

బాలాపూర్ లడ్డూ వేలం ప్రక్రియ 1994 నుంచి ప్రారంభమైంది. 1994లో తొలిసారి రూ.450 పలికిన లడ్డూ ఏడాదికేడాది అంతకంతకూ పెరిగిపోతూ రికార్డులకెక్కింది. గతేడాది స్కైలాబ్‌ రెడ్డి బాలాపూర్ గణేశుడి లడ్డూను రూ. 14.65 లక్షలకు సొంతం చేసుకున్నాడు.

మరోవైపు బాలాపూర్ గణనాథుడి శోభాయాత్ర కొనసాగుతోంది. విఘ్నేశ్వరుడు వాడవాడలా పూజలందుకుంటూ ముందుకు కదులుతున్నాడు.