నంద్యాలలో దొరికింది కోటిన్నర... పంచింది 60 కోట్లు!

నంద్యాల ఉపఎన్నికను ప్రతిష్ఠాత్మకంగా తీసుకున్న అధికార టీడీపీ, విపక్ష వైసీపీలు ఓటర్లను ప్రసన్నం చేసుకోడానికి యథేచ్చగా నగదు పంపిణీకి తెరతీశారు. తెలుగుదేశం తరఫున భూమా బ్రహ్మానందరెడ్డి, వైఎస్సార్ కాంగ్రెస్ తరఫున శిల్పా మోహన్ రెడ్డి పోటీ పడుతున్న ఈ ఎన్నికల్లో ఓటర్లకు భారీ ఎత్తున నగదు పంపిణీ జరిగినట్టు సమాచారం. ఈ ఎన్నికల్లో భాగంగా పోలీసులు జరిపిన తనిఖీల్లో దాదాపు కోటిన్నర రూపాయలు పట్టుబడగా, సుమారు రూ.60 కోట్ల ప్రజలకు పంపిణీ చేసినట్లు భోగట్టా. ఓ పార్టీ ఓటుకు రూ. 2 వేలు చెల్లిస్తే, మరో పార్టీ రూ. 1000 ఇచ్చినట్టు ప్రజలు చెవులు కొరుక్కొంటున్నారు. నాలుగు రోజుల కిందట నంద్యాల పరిధిలోని ఓ గ్రామంలో తొలుత ఓ ప్రధాన పార్టీ ఓటుకు రూ. 1000 చొప్పున పంపిణీ చేస్తే, అదే రోజు సాయంత్రం మరో పార్టీ వచ్చి ఓటుకు రూ. 2 వేల చొప్పున చెల్లించింది.

దీంతో ముందు పంపకాలు ప్రారంభించి రూ.1000 ఇచ్చిన పార్టీ అదనంగా మరో వెయ్యి చొప్పున ఇచ్చి వెళ్లిందట. ఇరు పార్టీల వ్యూహ ప్రతివ్యూహాలు ఎలా ఉన్నా, చివరకు పంపకాల్లో ఒక పార్టీ ముందడుగు వేసినట్టు ప్రచారం జరుగుతోంది. అభివృద్ధి పేరిట నంద్యాలలో తొలుత ప్రచారం సాగినప్పటికీ, చివరికి రెండు ప్రధాన పార్టీలు నోట్ల కట్టలను రంగంలోకి దింపాయి. కొన్ని ప్రాంతాల్లో ఒక్కో ఓటుకు రూ. 5 వేల వరకూ పలకగా, పలు చోట్ల తమకు నగదు అందలేదన్న నిరసనలూ వ్యక్తమయ్యాయి. నియోజకవర్గంలోని గ్రామాల వారీగా ప్రధాన పార్టీలు నియమించుకున్న బయటి వ్యక్తులు మాత్రమే డబ్బు పంపకాలను స్వయంగా పర్యవేక్షించారు.

స్థానిక కార్యకర్తలు ఓటర్ల ఇళ్లను చూపించడానికి పరిమితం కాగా, ఇంట్లోని ఓట్ల సంఖ్యను బట్టి డబ్బులను బయటి వ్యక్తులే అందించినట్లు తెలుస్తోంది. ఇక నంద్యాల పట్టణంలోని కొన్ని వార్డుల్లో స్థానిక నాయకులే డబ్బులను తమ జేబుల్లో వేసుకున్నారని కొందరు మహిళలు పెద్దపెట్టున నినాదాలు చేయడంతో అప్పటికప్పుడు వారికి నగదు పంచినట్లు సమాచారం. మొత్తం మీద ఈ ఎన్నిక తెలుగు రాష్ట్రాల్లో అత్యంత ఖరీదైన అసెంబ్లీ ఎన్నికలుగా నిలిచాయని రాజకీయ పరిశీలకులు అంచనా వేస్తున్నారు.