నంద్యాల ఉపఎన్నిక తేదీలు విడుదల!

ఆసక్తిని రేకెత్తిస్తున్న నంద్యాల ఉప ఎన్నిక షెడ్యూల్ విడుదల అయ్యింది. భూమా నాగిరెడ్డి హఠాన్మరణంతో అనివార్యం అయిన ఈ ఉపఎన్నిక నోటిఫికేషన్ ను జూలై 29న విడుదల చేయనున్నట్టుగా కేంద్ర ఎన్నికల సంఘం ప్రకటించింది. నామినేషన్లకు తుది గడువు ఆగస్టు ఐదో తేదీ. నామినేషన్ల ఉపసంహరణ గడువు ఆగస్టు తొమ్మిది. ఆగస్టు 23న పోలింగ్ జరగనుంది. ఓట్ల లెక్కింపు ఆగస్టు 28న జరగుతుంది. అదే రోజు ఫలితం వెల్లడి అవుతుంది.

షెడ్యూల్ విడుదల కావడంతోనే ఎన్నికల కోడ్ కూడా అమల్లోకి వచ్చినట్టు అయ్యింది. షెడ్యూల్ విడుదలతో నంద్యాల ఉపఎన్నిక ఘట్టం మరింత ఆసక్తికరంగా మారింది. ఇక్కడ పోటీకి అధికార తెలుగుదేశం, ప్రతిపక్ష వైఎస్సార్ కాంగ్రెస్ పార్టీలు ఇప్పటికే అభ్యర్థులను ప్రకటించాయి. తెలుగుదేశం పార్టీ తరపున భూమా బ్రహ్మానందరెడ్డి పోటీ చేస్తుండగా, వైఎస్సార్ కాంగ్రెస్ పార్టీ నుంచి శిల్పా మోహన్ రెడ్డి అభ్యర్థిగా ఖరారు అయ్యారు. ఇప్పటికే ప్రచార హోరు సాగుతోంది.

ముఖ్యమంత్రి చంద్రబాబు నాయుడు ఇప్పటికే రెండు సార్లు నంద్యాల్లో పర్యటించి వచ్చారు. ఉప ఎన్నికలో తెలుగుదేశం పార్టీని గెలిపించాలని కోరుతూ ఆయన బోలెడన్ని వరాలను ప్రకటించారు. ఇక తెలుగుదేశం పార్టీ తరపున ప్రచారానికి ఇరవై మంది ఎమ్మెల్యేలు, ఆరు మంది మంత్రులు, ఇంకా ఎమ్మెల్సీలు, కర్నూలు జిల్లా టీడీపీ నేతలు.. అక్కడే మకాం పెట్టారు. వైఎస్సార్ కాంగ్రెస్ పార్టీ కూడా నంద్యాల్లో భారీ ఎత్తున ప్రచారం చేస్తోంది. ఆ పార్టీకి చెందిన నేతలు, ఎమ్మెల్యేలు నంద్యాల్లో శిల్పా మోహన్ రెడ్డి గెలిపించాలని కోరుతూ ప్రచారాన్ని చేపట్టారు. షెడ్యూల్ విడుదల కావడంతో పార్టీలు ప్రచారాన్ని మరింత తీవ్రం చేసే అవకాశం ఉంది.