బీజేపీ పుండుపై.. కేశినేని కారం..

భారతీయ జనతా పార్టీతో తెలుగుదేశం పార్టీ పొత్తు వల్లనే తన మెజారిటీ తగ్గిందన్న తన వ్యాఖ్యలకు కట్టుబడినట్టుగా ప్రకటించారు విజయవాడ ఎంపీ, తెలుగుదేశం నేత కేశినేని నాని. ఇటీవల కేశినేని ఈ వ్యాఖ్యలు చేయగా.. భారతీయ జనతా పార్టీ తీవ్రంగా స్పందించింది. కేశినేని పొత్తు ధర్మానికి విఘాతం కలిగిస్తున్నారని.. ఆయన చేసిన వ్యాఖ్యలు వ్యక్తిగత అభిప్రాయమా లేక తెలుగుదేశం పార్టీ అభిప్రాయమో చెప్పాలని బీజేపీ నేతలు ప్రశ్నించారు. దానిపై కేశినేని ఇప్పటికే ఒకసారి స్పందించారు కూడా.

‘ఎంపీ మాట్లాడితే వ్యక్తిగతం అవుతుందా లేక పార్టీ అభిప్రాయం అవుతుందా?’ అని కేశినేని ఎదురు ప్రశ్నించారు. మరోసారి స్పందిస్తూ.. తను వాస్తవాలే మాట్లాడాను అని, తను చేసిన వ్యాఖ్యలకు కట్టుబడి ఉన్నట్టుగా బుధవారం ఆయన ప్రకటించారు. బీజేపీతో పొత్తు లేకుండా ఉంటే మరింత మెజారిటీ వచ్చేదని కేశినేని వ్యాఖ్యానించారు. తనకు ముఖ్యమంత్రి చంద్రబాబు నాయుడే అధిష్టానం అని.. తన వ్యాఖ్యల పట్ల ఆయన వివరణ కోరితే సమాధానం చెబుతానని అన్నారు.

తల పగులుతుందన్నా కొండను ఢీ కొట్టే తత్వం తనదని కేశినేని చెప్పుకొచ్చారు. తను చేసిన వ్యాఖ్యలు బహిరంగ సభలో కాదని, కార్యకర్తల సమావేశంలో అని, కార్యకర్తల్లో విశ్వాసం నింపడానికే అలా మాట్లాడాను అని ఎంపీ చెప్పడం గమనార్హం. ఈ మాటలతో కొంత తగ్గినట్టుగా కనిపించినా.. తను వాస్తవాలే చెప్పానని అనడం ద్వారా బీజేపీ నేతల పుండుపై కారం చల్లినట్టుగా వ్యవహరించారు నాని.