‘అమరావతి’కి హరిత ట్రైబ్యునల్ అనుమతి!

ఏపీ రాజధాని అమరావతి నిర్మాణానికి జాతీయ హరిత ట్రైబ్యునల్ (ఎన్జీటీ) అనుమతి ఇచ్చింది. రాజధాని నిర్మాణాన్ని వ్యతిరేకిస్తూ దాఖలైన నాలుగైదు పిటిషన్లపై విచారించిన ఎన్జీటీ శుక్రవారం తుదితీర్పును వెలువరించింది. అమరావతిలో పర్యావరణానికి హాని కలిగిస్తున్నారన్న పిటిషనర్ల అభ్యంతరాలను తోసిపుచ్చింది. అయితే, పర్యావరణం దెబ్బతినకుండా, నిబంధనలకు లోబడి నిర్మాణాలను చేపట్టాలని ఆదేశించింది. పర్యావరణ శాఖ విధించిన 191 నిబంధనలను కచ్చితంగా అమలుచేస్తూనే నిర్మాణాలు సాగాలని ఆంధ్రప్రదేశ్‌ ప్రభుత్వానికి సూచించింది.

పర్యవేక్షణ కోసం రెండు కమిటీలను ఏర్పాటు చేయాలని, నిర్మాణ పనులను నెలనెలా సమీక్షించాలని పేర్కొంది. కొండవీటి వాగు దిశను మార్చినా, దాని ప్రవాహానికి ముప్పు లేకుండా చూసుకోవాలని తెలిపింది. కరకట్టలను ముందుకు జరపరాదని, కృష్ణానది ప్రవాహానికి అడ్డంకులు కలిగించరాదని షరతులు విధించింది. చిన్ని చిన్న వాగులను పర్యావరణ శాఖ విధించిన 191 నిబంధనలను పకడ్బందీగా అమలు చేయాలని పేర్కొంది.

మరోవైపు నేషనల్ గ్రీన్ ట్రిబ్యునల్ తీర్పుతో రాజధాని రైతులు స్వీట్లు పంచుకున్నారు. ఈ సమాచారం ప్రసార సాధనాల ద్వారా తెలుసుకున్న రైతులు సంబరాలు చేసుకున్నారు. అలాగే మిఠాయిలు పంచుకున్నారు.