నైన్టీ బాటిల్ రూ.150... ఎన్నడూలేనంతగా డిమాండ్!

ఆంధ్రప్రదేశ్ లో కొత్త మద్యం విధానం అమలులోకి రావడంతో వైన్స్ షాపుల ప్రారంభానికి పలు ఆటంకాలు ఏర్పడ్డాయి. దీంతో మద్యం ఉత్పత్తులకు ఎక్కడలేని గిరాకీ ఏర్పడింది. విజయవాడ, గుంటూరు తదితర ప్రాంతాల్లో ఈ ఉదయం మద్యం దుకాణాలు తెరవగానే మందుబాబులు ఎగబడ్డారు. థియేటర్ ముందు రిలీజ్ సినిమా టికెట్ కోసం తన్నుకునే ప్రేక్షకుల మాదిరి వైన్ షాపుల ముందు చేరారు. ఎగబడిన మద్యం ప్రియులను అదుపు చేయడానికి వైన్ షాపుల యాజమానులు తీవ్రంగా శ్రమించాల్సి వస్తోంది. స్టాకు పరిమితంగా ఉండటం, కొన్ని షాపులు మాత్రమే తెరచుకోవడంతోనే ఈ పరిస్థితి ఏర్పడినట్లు పేర్కొంటున్నారు.

అంతే కాదు వైన్స్ షాపుల్లో నైన్టీ బాటిల్‌ను రూ. 150కి విక్రయించి దోచుకుంటున్నారని మందుబాబులు ఆరోపిస్తున్నారు. రూ. 110 ధర ఉండే క్వార్టర్ బాటిల్‌ను రూ. 170కి అమ్ముతున్నారని, తాము గంటన్నరగా ఇక్కడే ఉన్నా తమకు కావాల్సింది ఇంకా దొరకలేదని మరో వ్యక్తి వాపోయాడు. దీనిపై సమాచారం అందుకున్న పోలీసులు రంగంలోకి దిగి, కస్టమర్లను నియంత్రించి, లైన్‌లో నిలిపే ప్రయత్నాలు చేశారు. అయినా సరే పరిస్థితి ఇంకా సద్దుమణగ లేదట. కొత్త మద్యం పాలసీని ఏపీ ప్రభుత్వం ఇటీవలే ఖరారు చేసింది. మద్యం కోసం జనం ఏమాత్రం ఇబ్బంది పడకుండా ఉండేందుకు., వీలైనంత దగ్గర్లోనే తాగి తందనాలు ఆడేలా కొత్త పాలసీ ఖరారు చేసింది.

ప్రతి 30వేల మందికో బార్‌కు అనుమతించాలని నిర్ణయించింది. ఐదేళ్ల పాటు అమల్లో ఉండేలా కొత్త మద్యం విధానాన్ని ఎక్సైజ్‌ శాఖ రూపొందించింది. జులై 1నుంచి కొత్త మద్యం పాలసీ అమల్లోకి వచ్చింది. దీంతో 2005 నుంచి అమల్లో ఉన్న బార్లు, బీర్-వైన్‌ పార్లర్ల లైసెన్స్‌ విధానం రద్దయ్యింది. ఈ విధానం ప్రకారం జూన్‌ 30 వరకు లైసెన్స్‌ ఉన్న వారు కొత్త లైసెన్స్‌ కోసం దరఖాస్తు చేసుకున్నారు. కొత్త విధానంలో ఇప్పటి వరకు బార్లు లేని చోట కూడా అనుమతులు మంజూరు చేస్తారు. 30వేల జనాభాకు ఒకటి చొప్పున కొత్త బార్లు ఏర్పాటు కానున్నాయి.