హైదరాబాద్‌లో ఐసిస్ ఉగ్రవాదుల అరెస్ట్

హైదరాబాద్‌లో ఐసిస్‌ ఉగ్ర జాడలు కలకలం రేకెత్తించాయి. జాతీయ దర్యాప్తు సంస్థ (ఎన్‌ఐఏ) అధికారులు శనివారం (సెప్టెంబర్ 9) నగరంలో ముగ్గురు ఐసిస్‌ ఉగ్రవాదులను అరెస్టు చేశారు. మెహిదీపట్నం టోలీచౌక్‌ ప్రాంతంలోని బండ్లగూడ పరిధిలో అబ్దుల్‌ మాలిక్‌, ఫజులుల్లా, అబ్దుల్ ఖయ్యూం అనే వ్యక్తులను అదుపులోకి తీసుకున్నారు. లక్నో నుంచి వచ్చిన ఎన్‌ఐఏ అధికారులు స్థానిక పోలీసుల సహకారంతో బండ్లగూడలోని ఓ నివాసంపై దాడి చేసి.. ఉగ్రవాదులను రెడ్‌ హ్యాండెడ్‌గా పట్టుకున్నారు. అరెస్టైన ముగ్గురూ ప్రధానంగా ఉత్తరప్రదేశ్‌లో పలు ఉగ్రవాద కార్యకలాపాలకు పాల్పడినట్టు సమాచారం.

అంతర్జాతీయ ఉగ్రవాద సంస్థ ఇస్లామిక్‌ స్టేట్‌ (ఐసిస్‌)తో సంబంధాల విషయమై ఈ ముగ్గురిని ఎన్‌ఐఏ అధికారులు విచారించారు. అనంతరం లక్నోకు తరలిస్తున్నారు. ఐసిస్‌ ఉగ్రవాదులకు ఆశ్రయం ఇవ్వడం, వారి కార్యకలాపాలకు సహకరించడం లాంటి చర్యలకు వీరు పాల్పడ్డట్టు తెలుస్తోంది.