పోలీస్ రికార్డులు: నిశిత్ కారుకి వేగమెక్కువ

నిశిత్ నారాయణ ప్రాణం తీసింది అతివేగమేనని తేల్చారు పోలీసులు. ఆయన మద్యం సేవించి డ్రైవ్ చేయలేదని పోస్టు మార్టం రిపోర్టులు చెబుతున్నాయి. గంటకు 200 కిలోమీటర్లకు పైగా వేగంతో వెళ్లడం వల్లే కారు అదుపుతప్పి పిల్లర్ ఢీ కొట్టినట్టు తేల్చారు. కాగా నిశిత్ అతివేగంతో డ్రైవ్ చేయడం ఇదే మొదటిసారి కాదని పోలీసు రికార్డులు చెబుతున్నాయి. ప్రమాదానికి గురైన అదే బెంజ్ కారులో పలుసార్లు ఆయన మితిమీరిన వేగంతో డ్రైవ్ చేసినట్టు రికార్డుల్లో ఉంది. ప్రమాదానికి గురైన కారు నెంబర్ టీఎస్‌ 07ఎఫ్‌కే 7117. రెండున్నర కోట్ల రూపాయల విలువైన హై ఎండ్ బెంజ్ కారు.

ప్రమాదానికి గురైన కారులోని స్పీడో మీటర్

వేగంగా వెళుతున్న కార్లను ట్రాఫిక్ పోలీసులు స్పీడ్ గన్ తో గుర్తిస్తారు. ఈ ఏడాది మార్చి 10కి ముందు మూడునెలల్లో ఆ కారు మూడు సార్లు అతి వేగంతో వెళుతూ స్పీడ్ గన్ కు చిక్కింది. ట్రాఫిక్ పోలీసులు 4,305 రూపాయల ఫైన్ కూడా వేశారు. చివరగా మార్చి 10న ఫైన్ పడింది. ఇప్పుడదే కారులో వెళుతూ మృత్యుఒడిలోకి వెళ్లారు నిశిత్. కారును చాలా అరుదుగా డ్రైవర్ నడుపుతాడని, ఎక్కువగా నిశిత్, అతని స్నేహితులే డ్రైవ్ చేస్తారని కూడా పోలీసులు అంటున్నారు. మార్చి 10న ఫైన్ పడ్డాక సరిగ్గా రెండునెలలకే అంటే మే 10న నిశిత్ ప్రమాదం మరణించారు.