Nizamabad Temperature: ఠారెత్తిస్తున్న ఎండలు.. దేశంలోనే అత్యధిక ఉష్ణోగ్రత నమోదైన జిల్లాగా నిజామాబాద్!

తెలంగాణలోని అన్ని జిల్లాల్లో ఉష్ణోగ్రతలు అమాంతం పెరిగిపోవడంతో జనం ఉక్కిరిబిక్కిరవుతున్నారు. ఉష్ణోగ్రతలతో పెరగడంతో వడగాల్పులు వీస్తున్నాయి. దీంతో జనం ఇళ్ల నుంచి బయటకు రావడానికి భయపడిపోతున్నారు. శనివారం తెలంగాణలోని అన్ని జిల్లాల్లోనూ పగటి ఉష్ణోగ్రతలు 40 డిగ్రీలు దాటి నమోదయ్యాయి. ఇవి మరో నాలుగు రోజుల పాటు కొనసాగుతాయని భారత వాతావరణ శాఖ వెల్లడించింది. హైదరాబాద్, రంగారెడ్డి, మేడ్చల్, భద్రాచలం, మెదక్, ఆదిలాబాద్, రామగుండం, మెదక్, ఖమ్మం, మహబూబ్‌నగర్, నిజామాబాద్‌లో ఉష్ణోగ్రతలు 42 డిగ్రీలు దాటుతాయని ఐఎండీ హెచ్చరించింది. ప్రస్తుతం నిజామాబాద్ దేశంలోనే అత్యధిక ఉష్ణోగ్రత జిల్లాగా రికార్డులకెక్కింది. ఇక్కడ పగటి ఉష్ణోగ్రతలు 45 డిగ్రీలకు పైగా నమోదవుతున్నాయి. శ

శని, ఆదివారాలు ఆదిలాబాద్ జిల్లాలో రికార్డుస్థాయిలో 44 డిగ్రీ ఉష్ణోగ్రత, మిగతా 31 జిల్లాల్లో 41 నుంచి 42 డిగ్రీ ఉష్ణోగ్రతలు నమోదయ్యాయి. ఈ సీజన్‌లో సాధారణ ఉష్ణోగ్రతలు కంటే మూడు నుంచి నాలుగు డిగ్రీలు అధికంగా నమోదవుతాయని తెలంగాణ ప్లానింగ్ అండ్ డెవలప్‌మెంట్ సొసైటీ తెలిపింది. వచ్చే నాలుగు రోజుల్లో ఉష్ణోగ్రతలు 39 నుంచి 44 డిగ్రీల మధ్య ఉంటాయని, రాత్రిపూట కూడా సాధారణం కంటే రెండు డిగ్రీలు అధికంగా నమోదవుతాయని స్పష్టం చేసింది.

హైదరాబాద్‌లో ఆదివారం భానుడు భగ్గుమన్నాడు. నగరంలోని వివిధ ప్రాంతాల్లో 40 డిగ్రీలకు పైగా ఉష్ణోగ్రతలు నమోదయి, వడగాలులు వీచాయి. మధ్యాహ్నం 12 గంటల వరకూ ఆకాశం మేఘావృతమై ఉన్నా ఉష్ణోగ్రత 42 డిగ్రీలకు తాకింది. ఈ ఎండలకు భయపడి నగరవాసులు ఇళ్లకే పరిమితమయ్యే పరిస్థితి ఎదురయ్యింది. గత కొన్నేళ్లుగా ఏప్రిల్‌లో అత్యధిక ఉష్ణోగ్రతలు నమోదవుతూ భాగ్యనగర వాసులను ఠారెత్తిస్తున్నాయి. 2009లో 41.9, 2010లో 42.7, 2012 నుంచి 2015 వరకు 40 డిగ్రీలకు తక్కువ నమోదు కాలేదు. ఇక, 2016, 2017లో 43 డిగ్రీలు, 2018లో 42 డిగ్రీలు నమోదయ్యాయి.