నిజామాబాద్: యువతి ఆత్మహత్య.. యువకుడి ఇంటి ముందు గొయ్యి

ఓ యువతి ఆత్మహత్య రెండు వర్గాల మధ్య ఉద్రిక్తతలకు దారి తీసింది. నిజామాబాద్ జిల్లా నందిపేట మండలం లక్కంపల్లి గ్రామంలో ఈ ఘటన చోటు చేసుకుంది. గ్రామానికి చెందిన లత అనే యువతి గంగాధర్ అనే యువకుడు మూడేళ్లుగా ప్రేమించుకుంటున్నారు. ఈ విషయం ఈ విషయం ఇరువురి తల్లిదండ్రులకు తెలియడంతో వారిని తీవ్రంగా మందలించారు. ఈ ఉదంతంతో గంగాధర్ మొహం చాటేసినట్లు తెలుస్తోంది.

ప్రేమించిన వ్యక్తి తనను మోసం చేశాడని మనస్తాపానికి గురైన లత సోమవారం (జులై 9) ఒంటిపై కిరోసిన్‌ పోసుకుని నిప్పంటించుకుంది. తీవ్రంగా కాలిన గాయాలైన ఆమెను చికిత్స కోసం ఆస్పత్రికి తరలించారు. అక్కడ చికిత్స పొందుతూ మంగళవారం మృతి చెందింది. దీంతో యువతి కుటుంబసభ్యులు, బంధువులు యువకుడి ఇంటి ఎదుట ఆందోళన చేపట్టారు.

లత మృతికి గంగాధరే కారణమని ఆరోపిస్తూ అతడి ఇంటి ఎదుట మృతదేహాన్ని పూడ్చేందుకు గొయ్యి తవ్వారు. దీంతో ఇరువర్గాల మధ్య తీవ్ర ఉద్రిక్త పరిస్థితి నెలకొంది. విషయం తెలుసుకున్న పోలీసులు గ్రామానికి చేరుకుని ఇరు వర్గాలను శాంతిపజేశారు. యువకుడిని అరెస్ట్ చేస్తామని పోలీసులు హామీ ఇవ్వడంతో యువతి బంధువులు ఆందోళన విరమించారు.